Kəllə sümüyündə beyni qoruyan yeni immun müdafiə orqanı aşkarlandı
Alimlər kəllə sümüyünün iliyində beyni şişlərə və xəstəliklərə qarşı qoruyan, bir növ təhlükəsizlik məntəqəsi kimi fəaliyyət göstərən yeni immun quruluş aşkar ediblər.
AFN.az xəbər verir ki, Nature jurnalında dərc olunan bu kəşf xüsusilə ölümcül beyin xərçəngləri başda olmaqla, bir çox nevroloji xəstəliyin müalicəsində yeni dövrün başlanmasına yol aça bilər.
Vaşinqton Universitetinin Tibb Fakültəsinin tədqiqatçıları kəllə iliyinin yalnız qoruyucu sümük örtüyü olmadığını, beyinə xas immun reaksiyaları idarə edən mühüm mərkəzlərə ev sahibliyi etdiyini ortaya çıxarıblar.
Beyindən kəlləyə uzanan mikrokanalları flüoresan zülallarla izləyən tədqiqat qrupu limfa düyünlərinə bənzəyən və immun hüceyrələrin öyrədildiyi xüsusi strukturlarla qarşılaşıb.
Bu strukturlar müdafiə hüceyrələrini birbaşa kəllənin daxilində öyrədib çoxaldaraq, bədənin uzaq nahiyələrindən əlavə qüvvə gözləmədən təhlükələrə qarşı mübarizənin ən ön cəbhədə başlamasına imkan verir.
Aşkar edilən bu quruluşun gücü ölümcül beyin şişi növü olan qlioma daşıyan siçanlar üzərində sınaqdan keçirilib. Baş dərisinin altına tətbiq edilən xüsusi gel ilə immun mərkəz zəiflədildikdə şişlərin daha sürətlə yayıldığı müşahidə olunub.
Bunun əksinə, tərkibində immun sistemi gücləndirən zülallar olan gel tətbiq edilən təcrübə heyvanlarında kəllədəki müdafiə hüceyrələrinin şişlə daha effektiv mübarizə apardığı və sağqalma göstəricisinin əhəmiyyətli dərəcədə artdığı qeyd edilib.
Hələlik siçanlarda təsdiqlənən bu xüsusi hüceyrələrin insan kəlləsində də mövcud olduğuna dair güclü əlamətlər var. Tədqiqatçılar insanlarda da təsdiqlənəcəyi təqdirdə bu kəşfin tibb dünyasında böyük dönüş yaradacağını vurğulayırlar.
Baş dərisinin altına ediləcək sadə inyeksiya ilə birbaşa kəllədəki immun mərkəzi hədəfə almaq açıq beyin əməliyyatları ilə müqayisədə daha az riskli müalicə imkanı yarada bilər. Bu yanaşmanın yalnız beyin şişlərində deyil, Alzheimer, Parkinson və uzunmüddətli COVID kimi immun sistemlə əlaqəli bir çox beyin xəstəliyində də yeni imkanlar açması gözlənilir.
