Serbiya prezidenti istefa verməyə hazır olduğunu açıqlayıb
Kosovo albanları Serbiya ilə NATO arasında münaqişə yaratmağa çalışırlar.
AFN.az xəbər verir ki, bunu Serbiya prezidenti Aleksandr Vuçiç bildirib. Kosovo və Metohiya problemi ilə bağlı hökumətin növbədənkənar iclasını keçirən Vuçiç hesab edir ki, albanlar nizamlanma ilə bağlı öhdəliklərindən əl çəkmək üçün bəhanə axtarırlar. "Və nəzərə alsaq ki, Vaşinqton və Brüssel bu məsələdə onlara tam dəstək verir, Serbiyanın perspektivləri getdikcə daha qaranlıq olur".
Aleksandar Vuçiç Aİ, ABŞ, Fransa, Almaniya və İtaliyanın xüsusi nümayəndələrinin Belqrada səfərindən dərhal sonra xalqa müraciət edib. Rusiyanın NTV kanalı bu səfəri şərh edərək bildirib: "Qərb diplomatlarının Serbiya prezidentindən nə tələb etdiyini təxmin etmək çətin deyil: Kosovonun tanınması və Rusiyaya qarşı sanksiyaların tətbiqi. Bu barədə nə qədər sürətli qərar verilsə, bir o qədər yaxşıdır. Vuçiçin özü də açıq şəkildə bundan məmnun deyil".
Aleksandr Vuçiç açıqlamasında bildirib: “Bu beş nəfər gəldi və artıq ikinci cümlədə deyirlər: bu planı qəbul etməlisiniz! Əgər bunu qəbul etməsəniz, Avropaya inteqrasiya prosesinin dayandırılması, investisiyaların geri çəkilməsi və siyasi və iqtisadi sahədə kompleks tədbirlərlə üzləşəcəksiniz ki, bu da Serbiyaya düzəlməz ziyan vuracaq”.
Qərbin israr etdiyi Kosovo probleminin həlli ilə bağlı Fransa-Almaniya planı hələ rəsmi olaraq dərc edilməyib. Amma mətbuata sızan məlumatlara görə, Qərb Belqradla bağlı əsas tələbinin qeyd-şərtsiz yerinə yetirilməsində israrlıdır - Kosovonun beynəlxalq səviyyədə tanınmasına və tanınmamış respublikanın BMT-yə daxil olmasına mane olmamaq. Vuçiç əvvəlcə bunun qəti əleyhinə idisə, indi danışıqların zəruriliyindən danışır.
“Problemlərin həllinə daha rasional yanaşma yoxdur. Mən bunu “Böyük beşlik”lə görüşdə gördüm. Nə desəm də, nə qədər arqument versəm də, heç kim məni dinləmək istəmirdi. Ağıl artıq heç bir rol oynamır. Onların öz planları var - bu, Rusiyanın məğlubiyyətidir. Və yol boyu onların yoluna çıxan hər kəs təmizlənəcək" - deyə Vuçiç bildirib. O, eyni zamanda ölkəni xilas etmək lazım gələrsə, istefa verəcəyini bildirib. Bu vəziyyətdə Serbiya danışıqlarda altı ilə doqquz aya qədər vaxt qazanacaq.
