ABŞ 17 iranlını irimiqyaslı kiberkampaniyada ittiham edib
ABŞ hakimiyyəti 17 İran vətəndaşına universitetlərin, şirkətlərin və dövlət qurumlarının kompüter sistemlərinə qanunsuz müdaxilə üzrə irimiqyaslı kiberkampaniyada iştirak etdiklərinə görə ittiham irəli sürüb. İttiham tərəfinə görə, onlar İslam İnqilabı Keşikçiləri Korpusunun (SEPAH) və digər İran strukturlarının maraqları naminə hərəkət ediblər.
AFN.az xarici mediaya istinadən xəbər verir ki, bu barədə ABŞ Ədliyyə Nazirliyi məlumat yayıb.
Nazirliyin məlumatına görə, təqsirləndirilənlər 2013-cü ildən bəri 144 Amerika və 178 xarici universitetin, ən azı 53 şirkətin, həmçinin bir sıra dövlət qurumu və qeyri-hökumət təşkilatının kompüter sistemlərinə hücum ediblər. Onlar müəllim heyətinin təxminən 8 min hesabına daxil olub, ən azı 31,5 terabayt elmi məlumat və əqli mülkiyyət mənimsəyiblər.
Nazirlik iddia edir ki, hücumların bir hissəsi SEPAH-ın tapşırığı ilə həyata keçirilib, oğurlanmış məlumatlar isə İrandakı müştərilərə də satılıb. Hədəflər arasında ABŞ Əmək Nazirliyi, Energetikanın Tənzimlənməsi üzrə Federal Komissiya, Havay və İndiana ştatlarının hakimiyyət orqanları, BMT və UNICEF də olub.
