ABŞ-ın Bağdaddakı Səfirliyindən vətəndaşlarına "hazırlaşın, İraqa səyahət etməyin" xəbərdarlığı
ABŞ-ın Bağdaddakı Səfirliyi Ərbilə edilən pilotsuz uçuş aparatı hücumlarından sonra İraqdakı ABŞ vətəndaşlarına ən yüksək səviyyədə diqqətli olmaları barədə çağırış edərək, ölkəyə heç bir səbəblə səyahət edilməməsi yönündəki xəbərdarlığını təkrarlayıb.
AFN.az xəbər verir ki, Səfirliyin yayımladığı təhlükəsizlik xəbərdarlığında "İyulun 15-də İrana yaxın qrupların Ərbilə təşkil etdiyi PUA hücumlarından sonra İraqdakı ABŞ vətəndaşlarına ən yüksək səviyyədə hazır və diqqətli olmalarını tövsiyə edirik" ifadələrinə yer verilib.
Bəyanatda ABŞ vətəndaşlarından yerli medianı izləmələri və yerli qurumların təlimatlarına əməl etmələri istənilib.
Səyahət təhlükəsizliyinə dair xəbərdarlıqda isə ölkədəki hava məkanının hər an öncədən xəbərdarlıq edilmədən bağlana biləcəyi və uçuşların dayandırıla biləcəyi qeyd edilərək, sərnişinlərin Ərbil, Bağdad, Bəsrə və Süleymaniyyə hava limanlarına getmədən əvvəl aviaşirkətlərdən uçuş vəziyyətlərini yoxlamaları tövsiyə olunub.
Səfirlik həmçinin İraq üçün qüvvədə olan 4-cü səviyyə səyahət xəbərdarlığını xatırladaraq "Terror, adam oğurluğu, silahlı toqquşmalar, daxili iğtişaşlar və ABŞ hökumətinin vətəndaşlarına təcili yardım göstərmək imkanlarının məhdud olması səbəbindən İraqa heç bir səbəblə səyahət etməyin" çağırışını yeniləyib.
Bəyanatda bəzi heyət üçün məcburi təxliyə qərarı tətbiq olunmasına baxmayaraq, ABŞ-ın İraqdakı diplomatik missiyasının fəaliyyətini davam etdirdiyi bildirilib.
ABŞ vətəndaşlarının görüş və konsulluq xidmətləri üçün Bağdad Səfirliyi və Ərbil Baş Konsulluğu ilə e-poçt vasitəsilə əlaqə saxlaya biləcəkləri diqqətə çatdırılıb.
