UEFA İnfantino barədə cinayət işi başlanması üçün müraciətə hazırlaşır
UEFA FIFA prezidenti Canni İnfantino barədə Dünya Kuboku və digər turnirlərin kommersiya hüquqlarının özəl investorlara satılmasını nəzərdə tutan və gələn reaksiyalardan sonra ləğv edilən planla bağlı cinayət işi üzrə müraciət etməyə hazırlaşır.
AFN.az xəbər verir ki, BBC Sport-un əldə etdiyi sənədlərə əsasən, Avropa futbolunun idarəedici qurumu vəzifədən sui-istifadədə ittiham etdiyi İnfantino barədə İsveçrədə açılacaq məhkəmə işində istifadə olunmaq üçün sübut və sənədlərə çıxış tələb edib. UEFA həmçinin digər FIFA rəsmiləri barədə də hüquqi prosesə başlamağı nəzərdən keçirdiyini bildirib.
Bu yay keçirilən Dünya Kubokundan sonra İnfantino FIFA-nın turnir hüquqlarındakı səhmlərinin özəl investorlara satılmasını hədəfləyən “FIFA Forward Enterprise” adlı yeni şirkətin yaradılması təklifini gündəmə gətirmişdi. Sözügedən plan futbol ictimaiyyətinin sərt reaksiyalarından sonra geri çəkilib.
Sübutların tələb olunması ilə bağlı müraciətdə UEFA bu təşəbbüsün İnfantino və onun ətrafındakı dar bir çevrənin FIFA-nın ən dəyərli aktivlərində daimi pay əldə etməsi və FIFA-nın, üzvlərinin və futbol ailəsinin zərərinə öz maraqları naminə fayda əldə etməsi üçün vasitə olduğunu bildirib.
Müraciətdə həmçinin qeyd olunub ki, İnfantino bu planı yüksək səviyyəli idarəçilərin və əməkdaşların əksəriyyətinin ilk dəfə xəbər tutduğu, misli görünməmiş milyardlarla dollarlıq layihəni təsdiqləmələri üçün onlara cəmi bir neçə saat vaxt verilən tələsik təşkil edilmiş toplantıda qəbul etdirib.
UEFA və Avropa futbolunun aparıcı şəxsləri Çempionlar Liqasının püşkatmasından əvvəl Monakoda bir araya gələrək İnfantinonun vəziyyətini müzakirə ediblər.
Toplantıdan sonra UEFA tərəfindən verilən açıqlamada iştirakçıların institusional islahatların həyata keçirilməsi, prezident səlahiyyətlərinin məhdudlaşdırılması və FIFA-nın tək bir şəxsin ətrafında deyil, yenidən bir qurum kimi idarə olunmasının təmin edilməsi üçün bütün zəruri institusional, siyasi və hüquqi yollardan istifadə olunması məsələsində UEFA prezidenti və rəhbərliyinə yekdilliklə səlahiyyət verdikləri bildirilib.
BBC Sport məsələ ilə bağlı münasibət öyrənmək üçün İnfantino və FIFA rəsmilərinə müraciət edib.
UEFA-nın müraciətində hansı ittihamlar yer alır?
UEFA satılması planlaşdırılan səhmlərin dəyərinin müstəqil qurumlar tərəfindən təsdiqlənmədiyini və bazar dəyərindən xeyli aşağı təklif edildiyini irəli sürərək bu addımı İnfantinonun öz maraqları doğrultusunda təşviq etdiyi qeyri-qanuni bazar qiyməti kimi qiymətləndirib.
Məhkəmə ərizəsində İnfantinonun açıqladığı şərtlər çərçivəsində investorların açıq və rəqabətli tender keçirilmədən və ya müstəqil qiymətləndirici tərəfindən yoxlanılmadan, təxminən 20 milyard dollarlıq aşağı şirkət dəyəri əsasında FIFA-nın kommersiya qanadında 4,2 milyard dollar qarşılığında daimi maliyyə payı əldə edəcəkləri bildirilib.
UEFA İsveçrədə açmağı planlaşdırdığı cinayət işində istifadə olunmaq üçün Floridada yerləşən iki FIFA şirkəti – FIFA Americas və FWC2026-ya aid sənədlərə çıxış əldə etmək məqsədilə ABŞ məhkəməsinə müraciət edib.
Qurum 55 üzv federasiyanın bu satış planından zərər görə biləcəyini bildirərək İnfantino ilə yanaşı digər FIFA rəsmilərinə qarşı da məhkəmə iddiası qaldırıla biləcəyini vurğulayıb.
Müraciətdə UEFA və digər əlaqədar tərəflərin vəzifədən sui-istifadə ittihamı ilə İsveçrədə İnfantino, ehtimal olunan digər FIFA rəsmiləri və onların məsləhətçiləri barədə cinayət işi üzrə müraciət etməyə hazırlaşdıqları bildirilib.
Planın özlərindən və digər maraqlı tərəflərdən gizli şəkildə həyata keçirildiyini qeyd edən UEFA 28 iyul 2026-cı ildə İnfantinonun FIFA Şurası, UEFA, digər konfederasiyalar və ya 211 üzv federasiya ilə məsləhətləşmədən Dünya Kubokları və Klublararası Dünya Kubokunun kommersiya hüquqlarını yeni yaradılmış FIFA Forward Enterprise şirkətinə ötürmək planını ictimaiyyətə açıqladığını bildirib. Açıqlamada bu elan bir ildən artıq müddət ərzində gizli tərəfdaşlarla bağlı qapılar arxasında hazırlanmış layihənin üzə çıxması kimi qiymətləndirilib.
UEFA FIFA daxilində uzun müddətdir korrupsiya tarixinin mövcud olduğunu iddia edərək dünya futbolunun idarəedici qurumunun yalnız kənardan gələn siyasi təzyiqlər, ictimai nəzarət və beynəlxalq cinayət hüququnun müdaxiləsi nəticəsində geri addım atdığını bildirib.
Mərkəzi Sürixdə yerləşən FIFA üçün İsveçrə qanunlarının bu məhkəmə işinə imkan verdiyini bildirən UEFA hüquq məsləhətçilərinin bu prosesi təsdiqlədiyini qeyd edib.
Digər tərəfdən, UEFA-nın Nyu-Yorkdakı məhkəməyə müraciət edərək layihədə adı çəkilən Thrive Capital şirkəti və onun təsisçisi Coş Kuşner, həmçinin ABŞ mərkəzli investisiya bankı JP Morgan-dan sənədlər tələb etdiyi qeyd olunub. Koloradoda edilən digər müraciətdə isə layihənin kommersiya məsləhətçisi kimi göstərilən keçmiş Formula 1 rəhbəri Qreq Maffei və onun şirkəti Bann Ventures hədəf alınıb.
İnfantinonun planı niyə reaksiyalara səbəb oldu?
İnfantino Dünya Kubokunun hüquqlarının özəl sektora ötürülməsini nəzərdə tutan layihəni dəstəkləmələri şərtilə 211 üzv federasiyanın hər birinə 40 milyon dollar təklif etmişdi.
Avqustun əvvəlində layihəni ləğv etmək məcburiyyətində qalan isveçrəli rəhbərə istefa çağırışları davam edir. Reaksiyalara öncülük edən UEFA İnfantinoya olan etimadını itirdiyini açıqlayıb və üzvlərinin FIFA turnirlərini boykot edə biləcəyini bildirib.
Mart ayında dördüncü müddət üçün namizəd olmağa hazırlaşan İnfantino UEFA, KONKAKAF və Asiya Futbol Konfederasiyası tərəfindən yayımlanan birgə açıq məktubda dürüstlük qaydalarını pozmaqda ittiham edilib.
Birləşmiş Krallığa daxil olan futbol federasiyaları İnfantinoya verdikləri dəstəyi geri çəkərkən, Cənubi Amerika və Afrika konfederasiyaları, eləcə də bəzi ayrı-ayrı federasiyalar FIFA prezidentinə dəstəklərini davam etdirirlər.
