Nepal Turizm Şurası turistləri sahil zonalarından kənar durmağa çağırıb
Nepal Turizm Şurası ölkədə yeni daşqın təhlükəsinin davam etməsi ilə əlaqədar turistlərə sahil zonalarından və təhlükəli ərazilərdən uzaq durmağı kəskin şəkildə tövsiyə edib.
AFN.az xəbər verir ki, qurum bu barədə "X" sosial şəbəkəsində xəbərdarlıq yayıb.
"Davam edən daşqın təhlükəsini, axın boyunca göllərin qəfil daşması ehtimalını, eləcə də magistral yolların kütləvi şəkildə bağlanmasını nəzərə alaraq, turistlərə və səyahətçilərə vəziyyət yaxşılaşana qədər Rasuva, Nuvakot, Dhadinq, Kavrepalançok, Makvanpur dairələrində və digər aşağı axın ərazilərində sahil zonalarından, zərər görmüş və təhlükəli yol sahələrindən uzaq durmaq kəskin şəkildə tövsiyə olunur", - deyə şuranın bəyanatında bildirilir.
Qurum əlavə edib ki, turizm agentlikləri, trekinq şirkətləri, otellər və bələdçilər müştəriləri ilə müntəzəm əlaqə saxlamalı, zərər görmüş ərazilər vasitəsilə səfərlər təşkil etməzdən və ya onları davam etdirməzdən əvvəl yerli hakimiyyət orqanları və təhlükəsizlik xidmətləri ilə yollardakı vəziyyəti dəqiqləşdirməlidirlər.
