Zelenski: NATO-nun kollektiv müdafiəsinin bir parçası olmalıyıq
Ukrayna Prezidenti Volodimir Zelenski NATO-nun müasir müharibənin sınaqları ilə Ukrayna ilə birlikdə mübarizə apara biləcəyini vurğulayaraq, "NATO-nun kollektiv müdafiəsinin bir parçası olmalıyıq. Bu, hamımızı daha güclü edəcək" deyib.
AFN.az xəbər verir ki, Zelenski 36-cı NATO Dövlət və Hökumət Başçılarının Sammiti çərçivəsində ATO Congresium-da təşkil olunan Müdafiə Sənayesi Forumunda çıxış edib.
Ukraynaya, ölkənin müdafiə şirkətlərinə və imkanlarına göstərilən diqqətə görə təşəkkür edən Zelenski bu potensialın Avropadakı ən güclü imkanlardan biri olduğunu və xüsusilə müasir döyüş meydanında özünü doğrultduğunu ifadə edib.
Müharibələrin böyük ölçüdə dəyişdiyini və inqilabi transformasiyaların baş verdiyini bildirən Ukrayna lideri döyüş mühitindəki bu dəyişikliklərin Birinci Dünya Müharibəsində olduğu qədər şiddətli yaşandığını dilə gətirib.
Tarixdə müxtəlif silahların ixtirasına toxunan Zelenski bu gün isə pilotsuz uçuş aparatları, uzaqdan döyüşmək imkanları və hərb texnologiyasında ciddi dəyişikliklərin olduğunu diqqətə çatdırıb.
Ukraynanın cəbhədəki müharibəni özünü müdafiə naminə davam etdirdiyini qeyd edən dövlət başçısı hazırda hər ay təxminən 30 min rus hərbçisini zərərsizləşdirdiklərini və bunun böyük hissəsini PUA-lar vasitəsilə həyata keçirdiklərini bildirib.
Bundan qürur duymadıqlarını, lakin müasir müharibənin şərtlərinin belə olduğunu söyləyən Zelenski ölkəsini, xalqını və uşaqlarını qorumaq üçün vuruşmaq məcburiyyətində qaldıqlarını, hər gün düşmənin hərbi obyektlərini və texnikasını məhv etdiklərini bildirib.
Qara dənizin təhlükəsizliyini dəniz PUA-ları ilə təmin etdiklərini vurğulayan Zelenski bu aparatların sadəcə Rusiya gəmilərini sıradan çıxarmaq üçün deyil, qurudakı və havadakı hədəflərə də zərbə endirə bilən çoxməqsədli platformalara çevrildiyini əlavə edib.
Rusiya PUA-larının qarşısının alınması göstəricisinin 90 faizdən çox olduğunu deyən Ukrayna rəhbəri hər həftə minlərlə rus PUA-sının vurulduğunu və başqa heç bir ölkədə bu səviyyədə müdafiə potensialının olmadığını diqqətə çatdırıb.
Ukrayna müdafiə sektorunun genişmiqyaslı müharibə şəraitində belə imkanlarını artırdığını qeyd edən Zelenski tərəfdaşların dəstəyi və hava hücumundan müdafiə sistemləri sayəsində qanadlı raketlərin vurulma faizinin də çox yüksəldiyini bildirib.
Yüzlərlə Ukrayna şirkətinin müasir silahlar istehsal edərək müharibəni Rusiya üçün daha baha başa gələn bir prosesə çevirdiyini deyən Zelenski PUA təşəbbüsünə qoşulan tərəfdaşlara birgə istehsal və kritik infrastrukturun qorunması sahəsindəki əməkdaşlığa görə təşəkkür edib.
Avropada Rusiyanın ballistik raketlərinə qarşı güclü müdafiə xəttinin qurulmasının vacibliyini vurğulayan Zelenski mövcud "Patriot" istehsalının artan raket təhlükəsinə qarşı yetərli olmadığını və Avropanın 2030-cu ili gözləmədən ən qısa zamanda öz antiballistik sistemlərini inkişaf etdirməli olduğunu bəyan edib.
Hazırda ən böyük prioritetlərinin hava hücumundan müdafiə raketləri olduğunu, digər hər bir şeyi özlərinin istehsal edə bildiklərini deyən Zelenski bu məsələdə müttəfiqlərin qətiyyətinə ehtiyac duyduqlarını vurğulayıb.
Hava hücumundan müdafiə mövzusunun NATO Ankara Sammitinin başlıca qərarlarından biri olması üçün çağırış edən Zelenski bu alyansın gələcəyində Ukraynanın dayandığını, NATO daxilindəki Ukraynanın özü ilə bərabər fövqəladə bir müdafiə qabiliyyəti gətirəcəyini və Rusiyanın strateji üstünlüyü olduğu fikrini darmadağın etdiyini diqqətə çatdırıb.
Sonda Rusiyada vurulmamış böyük bir neft emalı zavodunun qalmadığını qeyd edən Zelenski Putindən fərqli olaraq zövq və ya geosiyasi məqsədlər üçün deyil, sadəcə ölkəyə gətirilən bu müharibədə öz müstəqilliklərini və insanlarını qorumaq üçün müdafiə olunduqlarını sözlərinə əlavə edib.
