NATO Ankara Sammitində elan edilən layihələrin təfərrüatlarını açıqlayıb
NATO Ankara Sammiti çərçivəsində Ankarada təşkil olunan Müdafiə Sənayesi Forumunda elan edilən layihələrin bəzi detallarını paylaşıb.
AFN.az xəbər verir ki, NATO-dan verilən bəyanatlara əsasən, 36-cı NATO Dövlət və Hökumət Başçılarının Sammiti çərçivəsində keçirilən forumda duyurulan və alyansın 10-cu "Airbus A330 MRTT" təyyarəsinin təhvil verilməsini nəzərdə tutan təşəbbüsü Belçika, Çexiya, Danimarka, Finlandiya, Almaniya, Lüksemburq, Niderland, Norveç və İsveç öz üzərinə götürəcək.
Yeni təşəbbüs məhsulları ortaq hovuzda toplama və xərcləri bölüşmə modelinə əsaslanacaq ki, bununla da daha az xərclə ortaq imkanlara nail olunması hədəflənir.
Müttəfiqlərin Havadan Erkən Xəbərdarlıq və Nəzarət təyyarəsi olaraq İsveçin "Saab" şirkətinin istehsalı olan 10 ədəd "GlobalEye" təyyarəsinin alınması layihəsində isə Belçika, Kanada, Danimarka, Almaniya, Latviya, Litva, Lüksemburq, Niderland, Norveç, Rumıniya və İsveç birgə fəaliyyət göstərəcək.
NATO-nun ABŞ-ın "Northrop Grumman" şirkəti tərəfindən istehsal edilən "MQ-4C Triton" pilotsuz uçuş aparatının (PUA) tədarükü ilə Kəşfiyyat, Müşahidə və Reconnaissance (ISR) donanmasını gücləndirmək layihəsində Danimarka, Finlandiya, Almaniya və Norveç yer alacaq.
Yeni PUA-lar İtaliyadakı Siqonella Hava Bazasında fəaliyyət göstərən NATO donanmasına qoşulacaq.
Bu layihə çərçivəsində "Northrop Grumman" şirkəti PUA-ları istehsal edəcək, "Airbus" və digər Avropa şirkətləri isə yerüstü idarəetmə seqmenti, məlumatların idarə edilməsi xidmətləri, komanda və idarəetmə sistemləri, infrastruktur və missiya dəstəyi həllərini təmin edəcəklər.
Eyni zamanda Ankara Sammitində elan edilən "HALO" layihəsi ilə müttəfiq ölkələrin milli nəzarəti altında olan hərbi peyklərin əlaqəsi gücləndiriləcək və bu sistemlər şəbəkə əsaslı böyük peyk sistemləri strukturuna inteqrasiya olunacaq. Bu layihə 8 müttəfiq ölkənin iştirakı ilə başladılıb.
"NATO Ümumi Təyinatlı Qeyri-birbaşa Atəş Sursatı" (GENIFR) adlı NATO standartlarında yeni 155 millimetrlik top sursatının parametrlərinin müəyyən edilməsi layihəsində isə Türkiyə, Kanada, Çexiya, Danimarka, Finlandiya, Yunanıstan, Norveç, Slovakiya və İsveç birlikdə çalışacaq.
Layihə ilə istehsal proseslərinin sürətləndirilməsi, uyğunlaşma və tədarükdən irəli gələn məhdudiyyətlərin aradan qaldırılması məqsəd qoyulub.
Müdafiə sahəsində kritik əhəmiyyətə malik xammalların tədarükü, saxlanması, daşınması və idarə olunması üçün elan edilən layihədə Türkiyə ilə yanaşı Belçika, Kanada, Danimarka, Finlandiya, Yunanıstan, İtaliya, Lüksemburq, Niderland, Norveç, İspaniya və İsveç yer alacaq.
Bu çərçivədə müdafiə sahəsində tədarük zəncirlərinin dayanıqlılığının gücləndirilməsi planlaşdırılır.
