Zelenski Ankarada hava hücumundan müdafiə sistemləri üçün təzyiq göstərəcək
Ukrayna Prezidenti Volodimir Zelenski Rusiyanın artan hücumlarına qarşı ölkəsini qorumaq məqsədilə təcili ehtiyac duyulan hava hücumundan müdafiə sistemlərinin tədarük edilməsi üçün NATO müttəfiqlərinə təzyiq göstərməyi planlaşdırır.
AFN.az xəbər verir ki, Rusiya raketlərinin bir həftədən az müddətdə paytaxt Kiyevi iki dəfə vurması, yaşayış binalarını hədəf alması və 50-dən çox mülki şəxsin həyatını itirməsi Zelenskinin yardım çağırışındakı təcililiyi artırır.
Türkiyədəki NATO Sammiti Zelenski üçün ABŞ Prezidenti Donald Tramp ilə kritik bir görüş keçirmək fürsəti də yaradır.
Ukrayna lideri Rusiyanın qəddar hücumlarının güc nümayişi deyil, əksinə zəiflik əlaməti olduğunu müdafiə edərək Vladimir Putinin ləyaqətli bir sülh üçün danışıqlara məcbur edilməsi barədəki arqumentini Trampa çatdırmağı hədəfləyir.
Ukrayna bir tərəfdən bu hücumlarla qarşı-qarşıya qalarkən, digər tərəfdən Rusiya daxilindəki neft emalı zavodlarına və hərbi hədəflərə qarşı uzaqmənzilli pilotsuz uçuş aparatı (PUA) hücumlarını artırır. Bu vəziyyət Rusiya daxilində ciddi yanacaq qıtlığına və elektrik kəsintilərinə yol açır.
Moskva meri Sergey Sobyanin hava hücumundan müdafiə sistemlərinin gecə boyu paytaxta doğru buraxılan 430 Ukrayna PUA-sının böyük hissəsini məhv etdiyini açıqlayıb. Lakin zərərin miqyası hələ tam olaraq bilinmir.
Rusiyanın sosial media hesablarında insanların benzin ala bilmək üçün saatlarla növbədə gözlədiyi və limit qoyulan yanacaq üçün mübahisə etdiyi görüntülər yer alır.
NATO Baş katibi Mark Rutte üzv dövlətlərə Ukraynanın suverenliyini qoruması üçün lazımi dəstəyi təmin etmək çağırışı edir. Rutte Kiyevin şərqdəki Rusiya quru qoşunlarını durdurma cəhdlərinə və PUA hücumlarına istinad edərək Ukraynanın döyüş meydanındakı dinamikanı dəyişdiyini vurğulayır.
Təkmilləşdirilmiş hava hücumundan müdafiə sistemlərinə duyulan ehtiyac isə hər ötən gün artır. Ukrayna Hərbi Hava Qüvvələrinin məlumatlarına görə, son hücumlarda PUA-ların demək olar ki, hamısı zərərsizləşdirilsə də, ballistik raketlərə qarşı uğur qazanılmayıb.
Ukrayna həmin hücumda tək bir ballistik raketi belə durdura bilməyib. Saatda bir neçə min kilometr sürətlə uçan bu raketlərə qarşı müqavimət göstərə biləcək ABŞ istehsalı "Patriot" raketlərinin sayı Ukraynada qeyri-kafi qalır.
Zelenski Avropa daxilindəki müttəfiqlərinə anbarlarında qalan "Patriot" sistemlərini Ukraynaya təhvil vermələri istiqamətində çağırış edir. Mülki ölümlər yaşanarkən bu sistemlərin anbarlarda saxlanılmasının heç bir mənası olmadığını bildirən Zelenski NATO-nun dəstəyi ilə Ukraynada bu sistemlərin analoqlarının istehsal edilməsi variantını da gündəmə gətirir.
Ukraynanın Rusiyanın dərinliklərindəki strateji nöqtələri hədəf alması Moskva rəhbərliyinə birbaşa təsir edir. Ukrayna PUA-ları iyun ayındakı Sankt-Peterburq İqtisadi Forumu ərəfəsində şəhərdəki bir neft terminalını, ardınca Moskvadakı bir neft emalı zavodunu və son olaraq Ukrayna sərhədindən 2500 kilometr uzaqlıqda, Sibirdəki Omsk neft emalı zavodunu vurub.
PUA-ların saatlarla radara yaxalanmadan uça bilməsi Rusiyanın hava hücumundan müdafiə xətlərindəki zəifliyini göstərir.
Ukraynanın bu təzyiq strategiyası Rusiyanın 2014-cü ildə ilhaq etdiyi Krımı da əhatə edir. Ukraynaya məxsus PUA-lar yarımadadakı hərbi loqistika xətlərini, neft emalı zavodlarını və elektrik stansiyalarını hədəf alaraq bölgədə elektrik kəsintilərinə, qida və yanacaq qıtlığına səbəb olur. Bölgədə rəsmi olaraq fövqəladə vəziyyət elan edilib.
Zelenski NATO müttəfiqlərinə və xüsusilə Trampa Ukraynanın bu müharibədə gedişatı tərsinə çevirdiyini izah etməyə çalışacaq. Kiyev rəhbərliyi qış ayları başlamazdan əvvəl müharibəni güclü bir mövqedə və ya diplomatiya yolu ilə sürətlə sonlandırmaq istəyir. Lakin bunun tək yolunun şəhərləri və mülki şəxsləri qoruyacaq daha çox müdafiə raketinə sahib olmaqdan keçdiyini müdafiə edir.
