NATO-nun 75 illiyinə həsr olunan sammit Ukrayna gündəmi ilə başlayacaq
NATO 32 üzvlə 75 illik yubileyini qeyd etməyə hazırlaşarkən, 9-11 iyul tarixlərində Vaşinqtonda Ukrayna əsaslı NATO Sammiti keçiriləcək.
NATO-nun baş katibi Yens Stoltenberqin sədrliyi ilə keçiriləcək sammitdə Türkiyəni prezident Rəcəb Tayyib Ərdoğan təmsil edəcək. Üzvlər sammitdə dövlət və hökumət başçıları səviyyəsində iştirak edəcəklər.
Rusiya-Ukrayna müharibəsinin əsas gündəm mövzusu olacağı sammitdə ittifaqın kollektiv müdafiə və çəkindirmə gücünün artırılması və xüsusilə Çinə qarşı ortaqlıqları diqqət mərkəzində olacaq.
Bu çərçivədə sammitə 32 üzvlə yanaşı, Ukrayna, Avstraliya, Yaponiya, Yeni Zelandiya və Cənubi Koreya liderləri də qatılacaq.
Finlandiya və İsveçin də iştirakından sonra ilk dəfə 32 üzvü ilə görüşəcək alyansın əsas gündəm maddəsi Ukraynaya dəstək olacaq.
Üzv ölkələr sammit çərçivəsində aparılan danışıqlardan sonra Ukraynaya əhəmiyyətli dəstək paketini açıqlayacaq.
2022-ci ildən bəri NATO üzvləri Ukraynanı dəstəkləmək üçün bu ölkəyə hər il təxminən 40 milyard avro yardım edib. Zirvə çərçivəsində üzvlərin Ukraynaya illik 40 milyard avro ayrılması və daha sonra dəstəyin davam etdirilməsi ilə bağlı razılığa gəlməsi gözlənilir.
Sammitdə NATO Ukraynaya beynəlxalq təhlükəsizlik dəstəyini koordinasiya etməyə imkan verəcək komanda mərkəzinin yaradılmasını da elan edəcək.
Yüzlərlə şəxsi heyətin olacağı və üç ulduzlu generalın rəhbərlik edəcəyi komanda mərkəzinin qərargahı Almaniyada olacaq.
