Aİ Rusiyaya qarşı sanksiyaların effektivliyini artırmaq üçün yeni layihə hazırlayır
Avropa İttifaqı Rusiyaya qarşı sanksiyalarda boşluqları müəyyən etmək və məhdudiyyətlərin həyata keçirilməsi üçün dövlətlər arasında koordinasiyanı yaxşılaşdırmaq üçün yeni layihə hazırlayır.
AFN.az-ın xəbərinə görə, bu barədə Aİ rəsmiləri Bloomberg-ə bildiriblər. Qeyd edilir ki, qurum Rusiyaya qarşı sanksiyalara nəzarəti əlaqələndirmək üçün yeni qurum yaratmağa hazırlaşır. Layihədə doqquz dövlət iştirak edəcək: Çexiya, Kipr, Danimarka, Macarıstan, Litva, Malta, Rumıniya, Sloveniya və İspaniya.
Bloomberg-in mənbəsi yeni layihənin iki il ərzində həyata keçirilməsinin planlaşdırıldığını bildirib. Qrup aktivlərin dondurulmasına cavabdeh olan orqanların siyahısını tərtib edəcək, ən yaxşı təcrübələri bölüşəcək və onların tətbiqini təkmilləşdirəcək. Avropa Komissiyası maliyyə xidmətləri üzrə ekspertlər təqdim edəcək və xərclərin bir hissəsini ödəyəcək.
Nəşrin məlumatına görə, layihə müxtəlif sahələrdə əsas islahatların və siyasi təşəbbüslərin həyata keçirilməsində üzv dövlətlərə dəstək olmaq üçün Komissiya tərəfindən işə salınmış texniki yardım alətinin bir hissəsidir. "Hələlik doqquz iştirakçı milli hökumət fəal iştirak etmək qərarına gəlsə də, üzv dövlətlərin böyük bir qrupu yeni təşəbbüsə maraq göstərib. Nəticələr bütövlükdə Aİ sanksiyalarından yayınmağa qarşı davam edən işlərdə istifadə olunacaq" - deyə agentlik bildirir.
Bloomberg bundan əvvəl Rusiyanın müharibə üçün lazım olan yarımkeçiriciləri və digər texnologiyaları idxal etmək üçün Qərbin sanksiyalarından yan keçdiyini bildirmişdi.
