Dünyaya ən çox bənzəyən planet 40 işıq ili uzaqlıqda tapıldı
Alimlər Yerə oxşar xüsusiyyətlərə sahib yeni bir ekzoplanetin izinə rast gəliblər. Ceyms Uebb Kosmik Teleskopu (JWST) ilə aparılan müşahidələr TRAPPIST-1e adlı planetin yaşayışa əlverişli bir atmosferə malik ola biləcəyini ortaya qoyub.
2016-cı ildə kəşf edilən TRAPPIST-1 sistemi Yer böyüklüyündə və qayalıq quruluşda olan yeddi planetə ev sahibliyi edir.
Onlardan bir neçəsinin yaşana bilən zonada yerləşməsi, yəni səthində maye suyun mövcud olma ehtimalı elm aləmində böyük həyəcan yaratmışdı. Lakin güclü ulduz partlayışlarının bu planetlərin atmosferini məhv etmiş ola biləcəyi səbəbindən onların yaşanabilirliyi mübahisəli idi.
Yeni məlumatlar TRAPPIST-1e-nin Venera və ya Mars kimi sıx karbon qazı atmosferinə sahib olmadığını, əksinə Yerə bənzər şəkildə azot üstünlük təşkil edən bir atmosferə malik ola biləcəyini göstərir.
Araşdırmanı aparan qruplar JWST vasitəsilə dörd müxtəlif tranzit müşahidəsini təhlil edib. Nəticələr hələ tam aydın deyil; planetin atmosferə sahib olması ilə yanaşı, atmosferdən tamamilə məhrum “çılpaq qayalıq” bir planet olması ehtimalı da var.
Bununla belə, məlumatlar azotla zəngin, az miqdarda karbon qazı və metan ehtiva edən atmosfer ehtimalını gücləndirir. MIT-dən astronom Sara Siger bildirib ki, “TRAPPIST-1e hələ də ən ümidverici yaşanabilən zona planetlərindən biridir və bu tapıntılar bizi bir addım daha irəli aparır.”
Yer atmosferinin təqribən 78 faizi molekulyar azotdan ibarətdir. Əgər TRAPPIST-1e-nin atmosferi təsdiqlənərsə, bu planet indiyə qədər kəşf edilmiş ən Yerə bənzər ekzoplanet ola bilər.
Tədqiqatçılar yaxın dövrdə JWST ilə aparılacaq yeni müşahidələrin nəticələri daha dəqiq göstərəcəyini bildirirlər. Araşdırmanın nəticələri The Astrophysical Journal Letters jurnalında dərc olunub.
