Kolumbiyadan Yunanıstana qızılgüllərlə 84 kiloqram kokain daşınıb
Yunanıstanda cinayət şəbəkəsinin Kolumbiyanın paytaxtı Boqotadan təzə qızılgül görünüşündə hazırlanmış bağlamalar vasitəsilə ölkəyə 84 kiloqram kokain keçirdiyi müəyyənləşdirilib. Səkkiz ay ərzində yeddi ayrı idxal həyata keçirən şəbəkə Müstəqil Dövlət Gəlirləri İdarəsinin keçirdiyi əməliyyat nəticəsində çökdürülüb.
AFN.az xəbər verir ki, Yunanıstana birbaşa göndəriş etməklə riskə getmək istəməyən şəbəkə gömrük və hüquq-mühafizə orqanlarının risk analiz sistemlərindən yayınmaq üçün qızılgülləri əvvəlcə Kanadaya göndərib.
Şübhəlilər daha sonra Kanadada yeni göndəriş sənədləri hazırlayıb və bağlamaların alıcısı kimi Attika bölgəsinin Artemida şəhərində fəaliyyət göstərən, hadisədən qısa müddət əvvəl icarəyə götürülmüş saxta çiçək dükanını göstəriblər.
Ümumilikdə 80 qutu qızılgül göndərişində hər 40 güldən ibarət buketin 11-nin kokainlə doldurulduğu müəyyən edilib.
Çiçəklərin real görünməsi üçün onların üst hissələrinin həqiqi, sap hissələrinin isə plastikdən hazırlandığı və içlərinin narkotiklə doldurulduğu aşkarlanıb. Bu üsul vasitəsilə narkotik maddənin gömrük yoxlamalarından gizlədilməsinə çalışılıb.
ABŞ Narkotiklərlə Mübarizə İdarəsinin Afinadakı ofisindən əldə edilən kəşfiyyat məlumatından sonra qurumun əməliyyat bölməsi hərəkətə keçib. Xüsusi təyinatlı və Mütəşəkkil Cinayətkarlıqla Mübarizə İdarəsinin əməkdaşlarının iştirakı ilə eyni vaxtda bir neçə ünvanda əməliyyat keçirilib.
Saxta çiçək dükanında və Marafonda icarəyə götürülmüş villada keçirilən basqınlar zamanı doqquz şübhəlidən yeddisi saxlanılıb.
Şübhəlilərin villada narkotik maddələrin saxlanması və emalı ilə məşğul olduğu müəyyənləşdirilib. Saxlanılan şəbəkə rəhbərlərindən birinin isə qətl ittihamı ilə Albaniya hakimiyyəti tərəfindən axtarışda olduğu aşkarlanıb.
Digər iki şübhəlinin saxlanılması istiqamətində tədbirlər davam etdirilir. Əməliyyata isə “Şər çiçəkləri” adı verilib.
