Şahzadə Diananın “qisas libası” hərraca çıxarılır
Şahzadə Diananın keçmiş həyat yoldaşı Şahzadə Çarlzın televiziya müsahibəsində Kamilla Parker-Bouls ilə münasibətini etiraf etməsindən bir neçə saat sonra Londonda keçirilən “Vanity Fair” gecəsində geyindiyi məşhur “qisas libası” hərraca çıxarılır.
AFN.az xəbər verir ki, 1994-cü ildə geyinilən bu libas illər ərzində şahzadə Diananın ən yaddaqalan obrazlarından birinə çevrilib.
Dizayner Kristina Stambolian tərəfindən xüsusi olaraq hazırlanmış qara ipək gecə libası ilə Diananın “Serpentine Gallery”yə etdiyi nümayişkaranə gəlişi populyar mədəniyyətin ikonik anlarından biri hesab olunur.
Media tərəfindən Diananın bu geyiminə “qisas libası” adı verilib.
Hərrac evi Sotheby's dekabrın 9-da keçiriləcək satış zamanı libasın 300 min dollara (220 min funt sterlinqə) qədər qiymətə alıcı tapa biləcəyini gözləyir.
Sotheby's-in yaydığı açıqlamada bildirilib ki, mərhum şahzadənin xeyriyyə təşkilatları üçün vəsait toplamaq məqsədilə geyimlərini satışa çıxardığı 1997-ci ildən bəri libas ilk dəfə hərraca təqdim olunur.
