Gecə yuxusu zamanı işığa məruz qalmaq ürək sağlamlığına zərər verə bilər
“European Heart Journal”da dərc olunan yeni araşdırmaya görə, gecə yuxusu zamanı işığa məruz qalmaq ürəyin quruluşunda və fəaliyyətində potensial olaraq zərərli dəyişikliklərə səbəb ola bilər.
AFN.az xəbər verir ki, əvvəlki araşdırmalar işıqlı mühitdə gecə yatmaqla koronar arteriya xəstəliyi, infarkt, ürək çatışmazlığı və insult riskinin artması arasında əlaqə olduğunu göstərib.
Lakin yeni tədqiqat gecə işığının ürəyin quruluşuna və fəaliyyətinə necə təsir etdiyini araşdıran ilk tədqiqat xüsusiyyətini daşıyır.
Tulane Universitetindən aparıcı tədqiqatçı doktor Lu Qi bildirib ki, ürəkdə müşahidə olunan bu struktur dəyişiklikləri, yəni yenidən qurulma prosesi, gecə vaxtı həddindən artıq işıqla əlaqələndirilən ürək problemləri riskinin artmasını izah etməyə kömək edə bilər.
Tədqiqatçılar ilkin mərhələdə ürək-damar xəstəliyi olmayan 11 071 iştirakçının məlumatlarını araşdırıblar.
İştirakçılar biləklərində işıq və hərəkət sensorları daşıyıblar. Bir neçə il sonra onların ürəkləri MRT müayinəsindən keçirilib.
Tədqiqat zamanı gecə yuxusunda demək olar ki, heç bir işığa məruz qalmayan şəxslərlə çox zəif işıqlandırılmış otaq səviyyəsindən ən azı 3 dəfə daha güclü işığa məruz qalan insanlar müqayisə edilib.
Pəncərədən otağa düşən küçə lampalarının işığı, elektron saatların ekranı və elektron cihazlardakı LED işıqlar araşdırmada mümkün işıq mənbələri kimi nəzərdən keçirilib.
Demoqrafik, həyat tərzi, sağlamlıq və ətraf mühit amilləri nəzərə alındıqdan sonra gecə yuxusu zamanı 3-cü səviyyədən yuxarı hər işıq məruz qalmasının ölçülə bilən ürək-damar zədələnməsi ilə əlaqəli olduğu müəyyən edilib.
Məsələn, ən yüksək işıq məruz qalması qrupunda olan iştirakçıların ən qaranlıq otaqlarda yatanlarla müqayisədə sol mədəciklərində orta hesabla 2,4 faiz böyümə, ürək divarında 1,5 faiz qalınlaşma və ürək əzələsinin yığılma qabiliyyətində 1,9 faiz azalma aşkarlanıb.
Araşdırma həmçinin ən çox işığa məruz qalan qrupdakı insanların ən az işıq qəbul edən qrupla müqayisədə ürək çatışmazlığı riskinin 29 faiz, infarkt riskinin 24 faiz, insult riskinin 33 faiz və ürək-damar xəstəliklərindən ölüm riskinin 26 faiz daha yüksək olduğunu ortaya qoyub.
Mütəxəssislər gecə işığının təsirini azaltmaq üçün sadə və ucuz tədbirlərin görülə biləcəyini vurğulayırlar. Bunlara qaranlıqlaşdırıcı pərdələrdən istifadə etmək, yataq otağında isti rəngli işıqlandırmaya üstünlük vermək və məişət cihazlarındakı kiçik LED işıqlarını söndürmək daxildir.
