9 Avropa ölkəsi hava limanlarındakı xaosdan sonra giriş-çıxış sistemini təxirə salıb
Fransa, Belçika, Niderland, Almaniya, Yunanıstan, Malta, Portuqaliya, İtaliya və İsveçrə texnologiya və sistemlər tam işlək vəziyyətə gətirilənədək Avropa İttifaqının mübahisəli giriş-çıxış sistemini (EES) tətbiq etməyəcəklərini açıqlayıb.
AFN.az xəbər verir ki, Avropa İttifaqına üzv olmayan ölkələrin vətəndaşlarından barmaq izi və üz skanı tələb edən sistem hava limanlarında uzun növbələrin yaranmasına səbəb olub.
Fransa, Belçika, Niderland, Almaniya, Yunanıstan, Malta, Portuqaliya, İtaliya və İsveçrənin sərhəd keçidlərində fasiləsizliyi qorumaq məqsədilə sistemin tətbiqini təxirə saldığı bildirilib.
Ötən ilin oktyabrında istifadəyə verilən sistemin aprel ayına qədər tam şəkildə qüvvəyə minməsi gözlənilirdi.
Ölkələrə yay aylarında səyahət xaosunun qarşısını almaq üçün nəzarət tədbirlərini dayandırmağa imkan verən 150 günlük güzəşt müddəti verilib.
Bu müddət sentyabrın 6-da başa çatsa da, 9 ölkə sistemlər lazımi qaydada işləyənədək nəzarət tədbirlərini tətbiq etməyəcəyini açıqlayıb.
Aviaşirkətlər və hava limanları Avropa İttifaqının yeni sərhəd nəzarət sistemini tətbiq etmə üsulunu tənqid ediblər.
“Ryanair” EES-dən azadolma müddətinin hava limanlarına və sərhəd xidmətlərinə kifayət qədər vaxt verilməsi üçün ən azı 2027-ci ilin aprelinə qədər uzadılmasına çağırıb.
“Ryanair”in əməliyyatlar üzrə rəhbəri Nil Makmahon prosesin əvvəldən axıra qədər fəlakət olduğunu və edilən xəbərdarlıqların nəzərə alınmadığını bildirib.
