Şotlandiya, Şimali İrlandiya və Uelsin müstəqillik tərəfdarı liderləri üçtərəfli görüşdə müstəqilliyi müzakirə edəcəklər
Birləşmiş Krallığın tərkibində olan 4 ölkədən 3-də regional hökumətlərə rəhbərlik edən müstəqillik tərəfdarı partiyaların liderləri Uelsdə öz müqəddəratını təyinetmə hüququ və ümumi maraqları müzakirə etmək üçün bir araya gələcəklər.
AFN.az xəbər verir ki, Şotlandiya, Şimali İrlandiya və Uelsdə hakimiyyətdə olan müstəqillik tərəfdarı partiyaların açıqlamasına görə, liderlər Con Svinni, Mişel O'Nil və Rün ap İorvert sabah Uelsin paytaxtı Kardiffdə görüşərək üç bölgəni maraqlandıran ümumi məsələləri müzakirə edəcəklər.
“Regional baş nazir” titulu əvəzinə Şotlandiya Milli Partiyası (SNP), Şinn Feyn (Şimali İrlandiya) və Plaid Kamri (Uels) partiyalarının liderləri kimi görüşəcək üç siyasətçiyə İrlandiya Respublikasının millətçi partiyası Şinn Feynin lideri Meri Lu MakDonald da qoşulacaq.
Plaid Kamri lideri Rün ap İorvertin rəhbərliyi ilə keçiriləcək görüşdə öz müqəddəratını təyinetmə hüququ, eləcə də Birləşmiş Krallığı təşkil edən İngiltərədən kənarda qalan 3 ölkə – Şotlandiya, Uels və Şimali İrlandiyanın ümumi maraqları müzakirə olunacaq.
İngiltərənin “The Telegraph” qəzeti isə üç liderin müstəqillik referendumu ilə bağlı anlaşma memorandumu imzalayacağını yazıb.
Müstəqillik tələbini bir daha gündəmə gətirmək üçün hazırlanmış sənədi imzalayacaq üç lider bu istiqamətdə İngiltərə Baş naziri Endi Börnhəmə daha çox təzyiq göstərməyi hədəfləyir.
Uels və Şotlandiyada müstəqillik tərəfdarı partiyalar parlamentdə çoxluğa malik olmasalar da, təkbaşına hakimiyyətdədirlər.
Parlamentində açıq separatçı üstünlüyün olmadığı Şimali İrlandiyada isə hakimiyyət bölgüsü modeli tətbiq olunur.
Baş nazir və baş nazir müavininin fərqli partiyalardan seçildiyi Şimali İrlandiyada hər iki şəxsin bərabər səlahiyyətlərə malik olması tələb olunur. Şimali İrlandiyada regional baş nazir vəzifəsini müstəqillik tərəfdarı Mişel O'Nil, baş nazir müavini vəzifəsini isə İngiltərə tərəfdarı Emma Littl-Penqelli tutur.
İngiltərə Baş naziri Börnhəm isə Şimali İrlandiyada əhalinin əksəriyyətinin Birləşmiş Krallığın tərkibində qalmaq istədiyini müdafiə edir.
İngiltərə Baş naziri Börnhəm daha əvvəl verdiyi açıqlamalarda Şimali İrlandiya və Şotlandiyanın müstəqilliyi ilə bağlı referendumları dəstəkləməyəcəyini və bunun qanunlara uyğun olmayacağını bildirib.
Dünən İrlandiya Baş naziri Mişel Martinlə görüşən ABŞ Prezidenti Donald Tramp isə Şimali İrlandiya ilə İrlandiya Respublikasının birləşməsini istədiyini və bunun möhtəşəm olacağını deyib.
Şotlandiyanın regional baş naziri Con Svinni görüşlə bağlı açıqlamasında “Börnhəm Birləşmiş Krallığın son baş naziri olmağa hazır olsun. Tarixdə ilk dəfə Şotlandiya, Uels və Şimali İrlandiya müstəqillik tərəfdarı hökumətlər tərəfindən idarə olunur” deyib.
