Tramp Kanadadan idxal olunan məhsullara tarifləri 50 faizə qaldıracağını açıqlayıb
ABŞ Prezidenti Donald Tramp gələn ildən etibarən Kanadadan idxal olunan avtomobillər, yük maşınları, avtomobil hissələri və polad üzərinə gömrük tariflərinin 50 faizə qaldırılacağını bildirib.
AFN.az xəbər verir ki, Tramp sosial media hesabında məsələ ilə bağlı paylaşım edib.
Paylaşımında Kanadanın illərdir ABŞ-ı aldatdığını iddia edən Tramp iki ölkə arasında 60 milyard dollarlıq kəsirin davam etdirilməsinin mümkün olmadığını və bunun artıq davam etməyəcəyini qeyd edib.
Tramp “1 yanvar 2027-ci ildə bütün avtomobillər, böyük və ya kiçik yük maşınları, avtomobil hissələri və polad üzərində tariflər 50 faizə qaldırılacaq. ABŞ-da istehsal edin, sıfır tarif ödəyin. Kanadaya artıq bir ştat kimi münasibət göstərilməyəcək” ifadələrini işlədib.
Kanadanın ticarət və digər sahələrdə əməkdaşlıq aparılması ən çətin ölkələr arasında olduğunu bildirən Tramp “Özlərini imtiyazlı hesab edirlər, halbuki bizim Kanadaya ehtiyacımız yoxdur, onların bizə ehtiyacı var. Ticarətlərinin 95 faizini ABŞ ilə həyata keçirirlər, bizim üçün isə bunun tam əksi keçərlidir” deyə sözlərini davam etdirib.
Qeyd edək ki, ABŞ-ın Kanadadan idxal olunan bir çox məhsula 50 faizlik gömrük tarifi tətbiq etmək təşəbbüsündən sonra aparılan ticarət danışıqlarından ötən həftə razılaşma əldə olunmayıb.
Kanadanın Baş naziri Mark Karni şənbə günü keçirdiyi mətbuat konfransında ticarət danışıqları zamanı ABŞ-ın iqtisadi baxımdan həyata keçirilməsi mümkün olmayan və ədalətsiz şərtlər təklif etdiyini bildirib. O, işçiləri, fermerləri, ailələri və biznesləri qorumaq məqsədilə Vaşinqtonun yeni tariflərinə eyni şəkildə cavab verəcəklərini söyləyib.
