Havadan benzin istehsal edən cihaz hazırlandı
ABŞ-lı bir şirkət havadakı karbon dioksidi istifadə edərək fosil ehtiva etməyən benzin istehsal edən cihaz hazırlayıb. Cihazın 2025-ci ilin payızında bazara çıxarılması gözlənilir.
Nyu Yorkda yerləşən yanacaq şirkəti Aircela atmosferdən birbaşa karbon dioksidi götürüb benzin istehsal edən yeni maşın hazırladığını açıqlayıb. Şirkət bildirib ki, bu cihaz yalnız hava, su və bərpa olunan enerji ilə işləyir və ətraf mühitə zərərli heç bir tullantı buraxmır.
Sənaye soyuducusu ölçüsündə olan cihaz illərdir mövcud olan birbaşa karbon tutma texnologiyasını fərqli şəkildə istifadə edir. Mövcud texnologiyalar adətən karbonu tutub saxlamaya yönəlmişkən, Aircela-nın maşını bu karbonu birbaşa yanacağa çevirir.
İstehsal edilən benzinin tərkibində klassik qalıq yanacaqlardan fərqli olaraq kükürd, etanol və ağır metalların olmadığı bildirilir. Üstəlik bu yanacağın hər hansı bir infrastruktur dəyişikliyinə ehtiyac olmadan mövcud benzin mühərriklərində istifadə edilə biləcəyi vurğulanır.
Aircela-nın CEO-su Erik Dalqren “Prototip deyil, işləyən maşın hazırladıq” deyərək cihazın aktiv işlədiyini qeyd edib. Popular Science jurnalına danışan şirkət nümayəndələri cihazın gündə təxminən 37 litr karbon dioksidi tutaraq 3,7 litr benzin istehsal edə və deposunda isə 64 litrədək benzin saxlanıla biləcəyini bildiriblər.
Maşının bazara çıxmazdan əvvəl qiyməti açıqlanmasa da şirkət uyğun qiymətli və miqyaslana bilən olmasının prioritetlərində olduğunu vurğulayıb. Kompakt ölçüsü sayəsində bu cihazın geniş yayılmasının daha sürətli və iqtisadi olacağı proqnozlaşdırılır.
Aircela karbon neytral yanacaq növlərinin yayılmasının ən sürətli yolunun belə daşına bilən sistemlər olduğunu düşünür. Şirkət cihazın ilk paylanmasına 2025-ci ilin payızında başlamayı planlaşdırır.
