Tramp Kanada və Meksika ilə yanaşı Avropa Birliyinə də tarif tətbiq edəcək
ABŞ prezidenti Donald Tramp Kanada və Meksika ilə yanaşı Avropa Birliyinə də (AB) tarif tətbiq edəcəklərini bildirərək, "Avropa Birliyi xətti keçdi" deyib.
Tramp Merilend ştatındakı Endryus Hərbi Hava Qüvvələrinin Birgə Bazasında jurnalistlərə açıqlama verib.
Meksika və Kanadaya tətbiq etdiyi gömrük rüsumlarını dəyərləndirən Tramp tariflərin genişləndirilib-genişləməyəcəyi ilə bağlı sualı cavablandırıb.
"Nə olacağını görəcəyik, amma əminliklə deyə bilərəm ki, Avropa İttifaqına tarif tətbiq olunacaq, çünki onlar bizdən istifadə ediblər və 300 milyard dollardan çox kəsirimiz var", - deyə Tramp qeyd edib.
AB-nin ABŞ-dan yerli məhsul almadığını müdafiə edən Tramp, “Avropa Birliyi xətti keçdi” deyib.
Tramp Aİ-yə tariflərin tətbiqi ilə bağlı vaxt verə bilməyəcəyini, lakin onların tezliklə tətbiq ediləcəyini və Böyük Britaniyanın həddini aşdığını, lakin bu məsələnin asanlıqla həll oluna biləcəyini söyləyib.
Kanada və Meksikaya tətbiq edilən tariflərlə bağlı Tramp "Tarifləri biz təyin etdik. Onların bizə borcu var və əminəm ki, ödəyəcəklər" deyib.
Tramp vurğulayıb ki, Meksika və Kanada ticarətdə bərabərliyi təmin etməli və qeyri-qanuni mühacirlərin ABŞ-a gəlməsinin qarşısını almalıdır.
Tramp fentanil məsələsinə də toxunaraq, Çin və Meksikaya çağırış edib: "Fentanili dayandırmalıyıq. Əgər bunu etməsələr, tariflər daha da pisləşəcək" deyib.
"İllərdir ki, hamıya kömək edirik, lakin onların bunu qiymətləndirdiyini düşünmürəm. Biz bunu tez bir zamanda dəyişəcəyik və Amerikanı yenidən möhtəşəm edəcəyik", - deyə Tramp vurğulayıb.
