ABŞ-ın İran strategiyasındakı dəyişiklik Brent neftinin qiymətini 85 dollardan aşağı salıb
Neft qiymətləri ABŞ-ın İrana qarşı hərbi hücumlardan iqtisadi təzyiqə yönələcəyini açıqlaması və İranla Oman arasında Hörmüz boğazındakı dəniz daşımaları marşrutu ilə bağlı razılaşma əldə olunması ilə 85 dollardan aşağı düşüb.
AFN.az xəbər verir ki, dünən 91,29 dollara qədər yüksələn Brent neftinin fyuçerslərinin bir barelinin qiyməti günü 87,27 dollarla başa vurub. Brent neftinin noyabr fyuçerslərinin bir barelinin qiyməti bu gün saat 11:55-ə olan məlumata görə, əvvəlki bağlanış qiyməti ilə müqayisədə təxminən 2,8 faiz azalaraq 84,86 dollar olub.
Eyni dəqiqələrdə Qərbi Texas tipli (WTI) xam neftin oktyabr fyuçerslərinin bir bareli isə 79,83 dollardan alıcı tapıb.
Qiymətlərdəki enişə ABŞ-ın İrana qarşı yeni hərbi hücumlar həyata keçirmə ehtimalının azalması və Hörmüz boğazından neft axınının artırıla biləcəyi ilə bağlı gözləntilər təsir edib.
Bundan əlavə, ticarət gərginliklərinin qlobal iqtisadi görünüş və neft tələbi ilə bağlı qeyri-müəyyənliyi artırması da qiymətlərə aşağı yönlü təzyiqi gücləndirib.
Bununla yanaşı, İranla Oman arasında Hörmüz boğazında müvəqqəti ortaq dəhlizin istifadəyə verilməsi ilə bağlı razılaşma əldə olunması da neft qiymətlərinin düşməsini dəstəkləyib.
Hörmüz boğazından kommersiya keçidlərinin arta biləcəyi ilə bağlı gözləntilər bölgədəki təchizat risklərinə dair risk əlavəsini azaldaraq neft qiymətləri üzərində aşağı yönlü təzyiqi artırsa da, boğazın statusu ilə bağlı qeyri-müəyyənlik və bölgədə davam edən geosiyasi risklər qiymətlərdəki enişi məhdudlaşdırır.
