Serbiya Rusiyaya qarşı sanksiyalar olmadan Aİ-yə daxil ola bilməz - AK sədri
Avropa Komissiyasının sədri Ursula fon der Leyen Serbiyanın Aİ-nin Rusiyaya qarşı sanksiyalarına qoşulmasını tələb edib. O bildirib ki, bunsuz Brüssel Belqradı etibarlı tərəfdaş hesab edə bilməyəcək.
AK sədri əks halda Serbiyanın bloka qoşulma ehtimalını istisna edib.
O, Serbiyaya səfəri zamanı mətbuat konfransında deyib: “Serbiyanın Aİ-yə daxil olması istiqamətində konkret addımlar atmasının vaxtı çatıb. Biz Rusiyaya qarşı sanksiyalar da daxil olmaqla, xarici siyasətimiz arasında daha yüksək səviyyəli uyğunlaşma görməliyik. Sizi Aİ-nin xarici siyasəti ilə 61% uyğunlaşma əldə etdiyinizə görə təbrik edirəm. Lakin daha çox şeyə ehtiyac var. Biz Serbiyanı etibarlı tərəfdaş kimi görmək istəyirik".
Qeyd edək ki, Aİ-nin genişlənmə prosesinin bir hissəsi olaraq, bütün namizəd ölkələr üzvlük üçün ilkin şərt olaraq xarici siyasətlərini 100% Brüsselə yönəltməlidirlər. Onlar Aİ-nin bütün xarici siyasət qərarlarına istisnasız olaraq riayət etməyə borcludurlar, baxmayaraq ki, bu ölkələrin onların qəbul edilməsinə heç bir təsiri yoxdur. Bu, Aİ-yə daxil olmaq üçün əsas ilkin şərtlərdən biridir, lakin onun tək yerinə yetirilməsi qəbula zəmanət vermir.
