İtaliyanın şimalı fırtınalarla, cənubu isə həddindən artıq istilərlə mübarizə aparır
Yağış və tufanlar İtaliyanın şimal bölgələrində həyata mənfi təsir göstərsə də, mərkəzi və cənub hissələrində yüksək temperatur qeydə alınıb.
İtaliya mətbuatında yer alan xəbərlərə görə, ölkə meteoroloji cəhətdən ikiyə bölünüb. Ölkənin şimal bölgələrində yağış və tufan, mərkəzi və cənub bölgələrində isə yüksək temperatur təsirli olub.
Şimaldakı Lombardiya Bölgəsinin paytaxtı Milanda güclü külək və qoz böyüklüyündə güclü dolu avtomobillərə maddi ziyan vurub.
İtaliya-İsveçrə sərhəddində yerləşən Komo gölünün bəzi nöqtələrində son günlər yağan yağışlar nəticəsində suyun səviyyəsinin artması səbəbindən daşqınlar baş verib.
Bölgənin Varese şəhəri və ətrafında da təsirli olan fırtına zamanı çoxlu ağaclar aşıb, yüksək ərazilərdə yağan yağışlar səbəbilə bəzi nöqtələrdə sürüşmə baş verib, yolların bağlanmasına səbəb olub.
Digər tərəfdən Afrikadan qaynaqlanan həddindən artıq istilərin təsiri ölkənin mərkəzi və cənub bölgələrində davam edir.
Səhiyyə Nazirliyi həddindən artıq istilərlə əlaqədar bəzi şəhərlər üçün risk səviyyəsini yeniləyib. Nazirlik həftəsonu mərkəzi və cənub bölgələrində 11 şəhəri “qırmızı” kateqoriyaya salaraq əhaliyə xəbərdarlıq edib.
