Tramp: Gələn həftə yeni FED sədri namizədini açıqlayacağıq
<p>ABŞ Prezidenti Donald Tramp ABŞ Mərkəzi Bankının (FED) sədri vəzifəsinə namizəd göstərəcəyi şəxsin adını gələn həftə elan edəcəklərini açıqlayıb.</p>
<p>Ağ Evdə keçirilən 2026-cı ilin ilk kabinet iclasında iqtisadiyyatla bağlı məsələlərə toxunan Tramp, administrasiyasının ilk ilində əldə olunan uğurlardan danışıb. O, sabiq prezident Co Bayden dövrünə aid etdiyi <b>"inflyasiya kabusuna"</b> son qoyduqlarını və nəhəng iqtisadi artıma nail olduqlarını vurğulayıb.</p>
<p>Tramp tətbiq edilən gömrük tariflərinin milli təhlükəsizliyi gücləndirdiyini və dövlət büdcəsinə görünməmiş gəlir gətirdiyini qeyd edib. Bu tariflərin şirkətləri ABŞ-da istehsal qurmağa sövq etdiyini deyən Tramp, mövzu ilə bağlı <b>ABŞ Ali Məhkəməsinin verəcəyi qərarın kritik əhəmiyyət kəsb etdiyini</b> bildirib.</p>
<p>Tariflər sayəsində yüz milyardlarla dollar gəlir əldə etdiklərini və bu vəsaiti geri qaytarmaq niyyətində olmadıqlarını deyən Tramp, məhkəmə iddiası qaldıran tərəfləri "Çin mərkəzli" olmaqda ittiham edib:</p>
<p><i>"Tariflər daha yüksək də ola bilərdi. Əslində bu məsələdə kifayət qədər mülayim davrandıq".</i></p>
<p>FED-in faiz qərarları ilə bağlı tənqidlərini davam etdirən Tramp, <b>yeni sədrin gələn həftə açıqlanacağını</b> və bu şəxsin yaxşı iş çıxaracaq biri olacağını söyləyib. FED-in mövcud faiz dərəcələrinin qəbulolunmaz dərəcədə yüksək olduğunu müdafiə edən prezident, ABŞ-ın dünyada ən aşağı faiz dərəcəsinə sahib ölkə olması lazım olduğunu təkrar edib. Trampın fikrincə, faizlər hazırkı göstəricidən <b>2, hətta 3 bənd daha aşağı</b> olmalıdır.</p>
<p>Xatırladaq ki, FED ötən gün faiz dərəcələrini gözlənildiyi kimi %3,5 - %3,75 aralığında sabit saxlayıb.</p>
<p><b>Trampın FED sədrliyi üçün nəzərdən keçirdiyi iddia edilən əsas namizədlər bunlardır:</b></p>
<p><b>Kevin Hassett:</b> Ağ Ev Milli İqtisadi Şurasının direktoru.<br /> <b>Kristofer Uoller:</b> FED İdarə Heyətinin üzvü.<br /> <b>Kevin Uorş:</b> FED-in keçmiş idarə heyəti üzvü.<br /> <b>Rik Rider:</b> "BlackRock" aktivlərin idarə edilməsi şirkətinin rəhbər şəxsi.</p>
<p>Qeyd edək ki, FED-in sədri Ceyrom Pauellin səlahiyyət müddəti <i>bu ilin may ayında</i> başa çatır.</p>
