1200 nəfərin cəsədi Ukraynaya qaytarılıb – Repatriasiya mərhələsi
Ukraynaya daha 1200 nəfərin cəsədi qaytarılıb – İstanbul danışıqlarının növbəti mərhələsi
İyunun 15-də, Ukraynaya daha 1200 nəfər həlak olmuş vətəndaşın cəsədi qaytarılıb. Bu, İstanbulda aparılan danışıqlardan sonra həyata keçirilən repatriasiya tədbirlərinin dördüncü mərhələsidir.
AFN.az xəbər verir ki, bu barədə Ukrayna Hərbi Əsir və Girovlarla İş üzrə Koordinasiya Qərargahı “Telegram” hesabında məlumat yayıb.
"Bunlar arasında, Rusiya tərəfinin bildirdiyinə görə, Ukrayna vətəndaşları – o cümlədən hərbçilər də var", – deyə məlumatda qeyd olunub.
Cəsədlərin şəxsiyyətinin müəyyənləşdirilməsi üzrə ekspertiza işlərini hüquq-mühafizə orqanları və Ukrayna Daxili İşlər Nazirliyinin ekspert strukturları həyata keçirəcək.
Repatriasiya prosesi Koordinasiya Qərargahının, Ukrayna Təhlükəsizlik Xidmətinin (SBU), Silahlı Qüvvələrin, Daxili İşlər Nazirliyinin, İnsan Hüquqları üzrə Ombudsman Aparatının, xüsusi şəraitdə itkin düşmüş şəxslər üzrə səlahiyyətli qurumun, Fövqəladə Hallar Xidmətinin və digər təhlükəsizlik strukturlarının birgə fəaliyyəti sayəsində mümkün olub.
Koordinasiya Qərargahı Beynəlxalq Qırmızı Xaç Komitəsinə göstərdiyi dəstəyə görə təşəkkürünü bildirib.
Əsir mübadiləsi
Xatırladaq ki, İstanbulda keçirilmiş ikinci danışıqlar raundu zamanı Ukrayna və Rusiya arasında əsir mübadiləsinin genişləndirilməsi razılaşdırılıb. Tərəflər yaralı, ağır xəstə və 18-25 yaş arasında olan əsirlərin geri qaytarılması barədə razılığa gəliblər.
Əsir mübadiləsi iyunun 9-u, 10-u, 12-si və 14-də həyata keçirilib. Sonuncu mərhələdə azad edilənlər arasında 2022-ci ildən etibarən əsirlikdə olan Mariupol müdafiəçiləri və zabitlər də olub.
Bundan əlavə, İstanbul danışıqlarında həlak olmuş şəxslərin cəsədlərinin "6000-ə qarşı 6000" formulu ilə qaytarılması razılaşdırılıb. Bu məqsədlə repatriasiya tədbirləri iyunun 11-i, 13-ü və 15-də keçirilib.
