Brent neftinin barrel qiyməti 106,51 dollara enib
Beynəlxalq birjalarda Brent neftinin barrel qiyməti 106,51 dollardan satılır.
AFN.az xəbər verir ki, dünən günü 107,77 dollarla bağlayan Brent nefti bu gün səhər saatlarında 1,1 faiz dəyər itirib. Eyni dəqiqələrdə "WTI" markalı xam neftin barreli isə 101,04 dollardan alıcı tapıb. Qiymətlərin enməsinə səbəb kimi investorların Yaxın Şərqdəki kövrək atəşkəs prosesini yaxından izləməsi və ABŞ ilə Çin liderləri arasında Pekində keçiriləcək zirvə görüşü öncəsi ehtiyatlı davranması göstərilir.
Ekspertlər bildirirlər ki, tədarük kəsintiləri ilə bağlı narahatlıqlar və Yaxın Şərqdəki qeyri-müəyyənliklər qiymətləri dəstəkləməyə davam edir, bu isə bazarda dəqiq istiqamət müəyyənləşdirməyi çətinləşdirir. ABŞ Prezidenti Donald Trampın İranla atəşkəsin "süni tənəffüs aparatına bağlı şəkildə" davam etdiyini bildirməsi və Hürmüz boğazının təhlükəsizliyi üçün "Azadlıq Layihəsi" əməliyyatını daha geniş miqyasda bərpa etməyi düşünməsi enerji təhlükəsizliyi ilə bağlı qayğıları artırıb.
Eyni zamanda, neft qiymətlərinin yüksəlməsi ABŞ iqtisadiyyatına da təsir göstərməyə başlayıb. Aprel ayında ABŞ-da istehlak qiymətlərinin son üç ilin ən yüksək səviyyəsinə qalxması inflyasiya təzyiqini gücləndirib. Bu vəziyyətin ABŞ Federal Ehtiyatlar Sisteminin (FED) qərarlarını çətinləşdirdiyi və faiz dərəcələrinin artırılma ehtimalını gücləndirdiyi qeyd olunur. Yüksək faizlərin borclanma xərclərini artıraraq neft tələbatını azalda biləcəyi proqnozlaşdırılır. Texniki baxımdan Brent neftində 106,69 dollar müqavimət, 105,93 dollar isə dəstək səviyyəsi kimi izlənilir.
