Çinin ixracatı güclü artım göstərib
Çinin ixracatı ABŞ və İsrailin İrana hücumları və İranın cavab zərbələri ilə Yaxın Şərqdə gərginləşən münaqişənin qlobal iqtisadiyyatda təsirlərinin hiss olunduğu aprel ayında güclü performans nümayiş etdirərək aylıq rekord səviyyəyə çatıb.
AFN.az xəbər verir ki, Çin Gömrük Baş İdarəsinin 2026-cı ilin aprel dövrünü əhatə edən xarici ticarət məlumatlarına görə, bu dövrdə ölkənin ixracatı illik bazda 14,1 faiz artaraq 359,4 milyard dollara, idxalatı isə 25,3 faiz artaraq 274,6 milyard dollara yüksəlib.
Aprel ayında 84,8 milyard dollar təşkil edən xarici ticarət profisiti mart ayındakı 51,1 milyard dollarlıq göstərici ilə müqayisədə ciddi artım kimi qiymətləndirilir.
Yaxın Şərqdəki müharibə və Hörmüz boğazındakı fasilələr səbəbindən dünyada enerji, xammal və nəqliyyat xərclərinin artdığı bir vaxtda Çinin ixracatının aylıq rekord qırması qlobal iqtisadi dalğalanmalara qarşı dözümlülük göstəricisi hesab olunur.
İdxalın artmasında isə enerji və xammal qiymətlərinin yüksəlməsi əsas rol oynayıb. Belə ki, Çin bu dövrdə 38,4 milyon ton neft idxal edib və neft idxalının həcmi 20 faiz azalsa da, pul ifadəsində dəyəri 13,2 faiz artıb.
Qeyd edək ki, Yaxın Şərqdəki müharibə qlobal ticarət üçün kritik keçid məntəqəsi olan Hörmüz boğazında gəmi hərəkətinin böyük ölçüdə kəsilməsinə səbəb olmuşdu.
Səudiyyə Ərəbistanı, BƏƏ, Küveyt, Qətər, İraq və İranın karbohidrogen ehtiyatlarını dünya bazarlarına çıxaran bu boğaz dünya neft ticarətinin təxminən 25 faizinin, mayeləşdirilmiş təbii qazın 20 faizinin və gübrə ticarətinin 30 faizinin əsas marşrutu sayılır.
Çinin idxal etdiyi neftin təxminən 45 faizi və mayeləşdirilmiş təbii qazın 30 faizi məhz Bəsrə körfəzi və Hörmüz boğazı vasitəsilə ölkəyə çatır.
Boğazdakı tanker hərəkətində yaranan fasilələr qlobal neft tədarükündə axsamalara və qiymətlərin bahalaşmasına yol açmaqda davam edir.
