ChatGPT-yə yeni məhdudiyyətlər: Sağlamlıq, hüquq və maliyyə sahəsində məsləhət dönəmi sona çatdı
ChatGPT-yə tətbiq edilən yeni qaydalara görə, istifadəçilər artıq tibbi, hüquqi və maliyyə mövzularında birbaşa məsləhət ala bilməyəcək.
29 oktyabr tarixindən qüvvəyə minən tənzimləmə ChatGPT-nin məsləhətçi deyil, tədris vasitəsi kimi təsnif olunmasını əhatə edir. Böyük texnologiya şirkətləri mümkün hüquqi məsuliyyət və iddia risklərini əsas gətirərək modelin funksiyalarını məhdudlaşdırıb.
Artıq ChatGPT yalnız ümumi prinsipləri izah və nümunəvi mexanizmləri təqdim edəcək, istifadəçiləri həkim, vəkil və ya maliyyə məsləhətçisinə yönləndirəcək.
Sağlamlıq, hüquq və maliyyə sahələrində qırmızı xətt
Yeni qaydalar açıq şəkildə bildirir ki, tətbiq dərman adı və dozası, investisiya məsləhəti verə, iddia sənədi hazırlaya bilməz.
Bu addım süni intellektin yanlış istiqamətləndirmə riski barədə uzun müddət narahatlıq bildirən mütəxəssislərin tələblərinə cavab verir.
OpenAI-nin qəbul etdiyi tədbirlər yalnız sağlamlıqla məhdudlaşmır. ChatGPT-nin psixoloji dəstək və ya terapiya məqsədilə istifadəsinin də təhlükəli ola biləcəyi vurğulanır.
Model insan davranışını oxuya, empatiya qura və hüquqi öhdəlik daşıya bilmir. Eyni zamanda şəxsi gəlir, borc və risk meylini təhlil edə bilmədiyi üçün maliyyə və vergi məsləhəti verməsi qadağan olunub.
Mütəxəssislər istifadəçilərin gəlir, şəxsiyyət və ya bank məlumatlarını paylaşmasının məlumat təhlükəsizliyi baxımından ciddi risk daşıdığını da xəbərdar edirlər.
Yeni məhdudiyyətlər etik sahələri də əhatə edir. ChatGPT-nin ev tapşırıqları, imtahanlar və ya sənət əsərlərinin istehsalında fırıldaq məqsədilə istifadə olunmasının həm təhsil etikası, həm də müəllif hüquqlarına zidd olduğu xatırladılıb.
Süni intellektə gətirilən bu yeni qırmızı xətlər modelin sərhədlərini aydınlaşdırır.
ChatGPT artıq mütəxəssislərin yerini tutan məsləhətçi deyil, məlumatı öyrədici şəkildə təqdim edən köməkçi kimi fəaliyyət göstərir.
Mütəxəssislərə görə, bu dəyişiklik texnologiyanın həqiqi insan mütəxəssisinin yerini tuta bilməyəcəyi faktını rəsmən qəbul etməsi deməkdir.
