ABŞ-da xəstə meymun təşvişi: Yük maşını aşdı, heyvanlar qaçdı
ABŞ-ın Mississippi ştatında elmi araşdırmalar üçün istifadə olunan meymunları daşıyan yük maşınının aşması nəticəsində qaçan bir neçə heyvan öldürülüb, biri isə qaçmağa nail olub.
Hadisə Jasper dairəsində baş verib. Yerli Şerif Departamentinin məlumatına görə, qəza zamanı maşında olan meymunlar bir müddət azadlıqda qalıb, lakin qaçanlardan yalnız biri sağ qalıb. Rəsmilər heyvanların aqressiv davranışlar sərgilədiyini bildiriblər.
Tulane Universiteti isə açıqlama yayaraq meymunların yoluxucu olmadığını bəyan edib. Bununla belə, Şerif Departamenti əvvəlcə heyvanların herpes kimi bəzi xəstəlikləri daşıya biləcəyindən şübhələndiklərini açıqlamışdı.
Tədqiqat məqsədli növlər idi
Rəsmilərin məlumatına görə, maşında daşınan meymunlar Rhesus (rezus) növünə aiddir. Bu növ tibbi və bioloji tədqiqatlarda ən çox istifadə olunan primat növlərindən biridir. Hər biri təxminən 7,7 kiloqram çəkidə olan bu meymunlar Luiziana ştatındakı Tulane Universiteti Milli Biotibbi Araşdırma Mərkəzinə məxsusdur.
Mərkəz elmi araşdırma müəssisələrinə mütəmadi olaraq primat təqdim edən ABŞ-dakı əsas tədqiqat mərkəzlərindən biridir. Meymunları kimin daşıdığı və hara aparıldığı hələlik açıqlanmayıb.
Sürücü xəbərdarlıq edib
Şerif Departamentinin bildirdiyinə görə, yük maşını sürücüsü qəza sonrası rəsmilərə meymunların yalnız fərdi qoruyucu vasitələrlə tutulmasının mümkün olduğunu deyib və onların təhlükəli ola biləcəyinə dair xəbərdarlıq edib.
Hadisə ilə bağlı araşdırma davam edir.
