Adada unudulan yaşlı qadın ölü tapıldı
Avstraliyada Böyük Set Resifi yaxınlığındakı Lizard adasında gəzintiyə çıxan 80 yaşlı bir qadın kruiz gəmisi tərəfindən adada unudulub. Qadının cansız bədəni ertəsi gün tapılıb.
Hadisə Coral Adventurer adlı sərnişin gəmisinin şənbə günü Lizard adasında keçirdiyi gəzinti zamanı baş verib. Qadının digər sərnişinlərlə birlikdə adanın ən yüksək nöqtəsi olan Cook’s Look zirvəsinə qalxdığı, lakin bir müddət sonra dincəlmək üçün qrupdan ayrıldığı bildirilib.
Gəmi gün batımı zamanı adadan ayrılıb, lakin bir neçə saat sonra qadının itkin olduğu aşkar edilərək geri dönüb. Başlanmış genişmiqyaslı axtarış əməliyyatı nəticəsində qadının cansız bədəni bazar səhəri tapılıb.
Avstraliya Dəniz Təhlükəsizlik Agentliyi (AMSA) hadisə ilə bağlı araşdırma başladığını və gəmi bu həftə Darvin limanına çatdıqda heyətlə görüşəcəyini açıqlayıb. Qurum hadisənin şənbə günü yerli vaxtla saat 21:00-da gəmi kapitanının məlumat verməsi ilə onlara çatdığını bildirib.
Coral Expeditions şirkətinin CEO-su Mark Fifield faciəli ölüm səbəbilə dərin kədərləndiklərini qeyd edib.
Qadının Avstraliya sahilləri boyunca keçirilən 60 günlük kruiz turunun ilk dayanacağında olduğu, turun bilet qiymətlərinin on minlərlə dollar təşkil etdiyi bildirilib.
Coral Adventurer gəmisi 120 sərnişin və 46 ekipaj üzv tutumuna malikdir. Gəmi Avstraliyanın ucqar sahillərinə çatmaq üçün xüsusi dizayn olunub və sərnişinləri günlük turlara aparmaq üçün kiçik qayıqla təmin edilib.
Queensland Polisi hadisənin “ani və şübhəsiz ölüm” kimi qiymətləndirildiyini və məhkəmə tibbi ekspertizası hazırlanacağını açıqlayıb.
