KİV: Zelenski münaqişənin dondurulması üçün ərazi güzəştlərinə hazırdır
Ukrayna hərbi əməliyyatları dayandırmaq və silah tədarükü və NATO-ya üzvlük yolu kimi təhlükəsizlik zəmanəti almaq üçün itirilmiş ərazilərindən imtina edə bilər.
AFN.az xəbər verir ki, Britaniyanın The Daily Telegraph qəzetinin mənbələrə istinadən verdiyi məlumata görə, Vladimir Zelenski Rusiya-Amerika sammiti öncəsi mövqeyini yumşaldıb.
Bildirilir ki, Ukrayna hakimiyyəti hazırkı döyüş təmas xətti boyunca münaqişəni dondurmağa hazırdır. Bununla yanaşı, Kiyev DXR, LPR, Xerson və Zaporojya vilayətlərində onun nəzarətində olan əraziləri vermək istəmir.
Qəzetin qeyd etdiyi kimi, avropalı rəsmilər hesab edir ki, Zelenskinin “döyüş əməliyyatlarının dayandırılması müqabilində Moskvaya ərazi güzəştlərinə razılaşmağa hazır olan daha çox sayda [Ukraynalı] seçicinin maraqları naminə hərəkət etmək imkanı var”. Nəşrin fikrincə, Zelenski “ağıllı olmalıdır, çünki ölkə konstitusiyası ona ümumxalq səsverməsi olmadan əraziləri verməyə icazə vermir”.
Nəşrin yazdığına görə, ərazilərdən imtina müqabilində Kiyev “silah tədarükü və NATO-ya üzvlük yolu şəklində etibarlı təhlükəsizlik zəmanəti” alacağını gözləyir.
