Harvard ABŞ-ın blokladığı 2,5 milyard dollar üçün məhkəməyə müraciət etdi
Harvard Universiteti ABŞ administrasiyasının blokladığı 2,5 milyard dollar məbləğində maliyyənin açılması üçün məhkəməyə müraciət edib. Universitet bu qərarın qanunsuz olduğunu və ölkənin ən qədim ali təhsil müəssisəsinə qarşı ədalətsizlik təşkil etdiyini bildirib.
AFN.az “Reuters”ə istinadən xəbər verir ki, Harvard Bostondakı ABŞ Dairə Məhkəməsinə təqdim etdiyi iddiada aprelin 14-dən etibarən universitetə qarşı 957 sifariş verildiyini qeyd edib. Bu qərarların məqsədi milli təhlükəsizlik, xərçəng və yoluxucu xəstəliklərin müalicəsi sahəsində aparılan tədqiqatların maliyyələşdirilməsini dondurmaq olub.
Sənəddə bildirilir ki, bu məhdudiyyətlərin əsas səbəbi Harvard Universitetinin Ağ Ev tərəfindən irəli sürülmüş bəzi tələbləri yerinə yetirməkdən imtina etməsidir.
Xüsusilə vurğulanır ki, HİV xəstəliyinə dair tədqiqatların dayandırılması, Müdafiə Nazirliyinin bioloji təhlükələr sahəsində məlumatlılığının artırılması layihələrinin ləğvi ictimai sağlamlıq üçün ciddi təhdid yaradır.
Harvard bu məhdudiyyətlərin ABŞ ictimaiyyətinə faydalı olan fundamental elmi araşdırmalara zərbə vurduğunu bildirərək, məhkəmədən maliyyənin bərpasını tələb edir.
