Tramp administrasiyasına etiraz edən senator 25 saat ərzində tribunadan ayrılmayıb
ABŞ-ın Demokrat senatoru Kori Buker Donald Trampın siyasətlərinə etiraz etmək üçün Senat zalındakı kürsüdə 25 saatdan çox fasiləsiz çıxış edərək Senat tarixində ən uzun çıxış rekordunu qırıb.
ABŞ Senatının Baş Assambleyasında çıxışına bazar ertəsi yerli vaxtla saat 19:00-da başlayan və 25 saat 4 dəqiqə sonra tamamlayan demokrat senator Buker ölkədə gündəm mövzusu olub.
Buker ABŞ mediası tərəfindən də canlı yayımlanan çıxışında Tramp administrasiyasının büdcə kəsirlərini, federal hökumətdə işdən çıxarmalarını və Hökumətin Səmərəliliyi Departamentinin (DOGE) nəzdindəki büdcə daralma əməliyyatlarını tənqid edərək rekord qırıb.
Çıxışının əvvəlində o, "Fiziki gücüm olduğu müddətcə ABŞ Senatının normal işini pozmaq niyyəti ilə ayağa qalxıram. Ölkəmizin böhran içində olduğuna inandığım üçün bu gecə ayaq üstə qalıram" deyib. Buker çıxışını çərşənbə axşamı axşama qədər davam etdirib.
Buker sosial təminat, Medicaid və immiqrasiya da daxil olmaqla, ölkənin gündəmindəki bütün əsas məsələlərə toxunan açıqlamalar verib.
25 saat 4 dəqiqə davam edən çıxışı Senat tarixinin ən uzun çıxışı olaraq qeyd edilsə də, Buker məqsədinin Trampın yanlış siyasətlərinə diqqət çəkmək olduğunu bildirib.
Qeyd edək ki, ABŞ Senatında indiyə qədər ən uzun çıxış 2003-cü ildə ölən senator Strom Surmondun 1957-ci ildə Mülki Hüquqlar Aktına qarşı çıxdığı 24 saat 18 dəqiqəlik çıxışı olaraq qeydə alınıb.
