ABŞ-da baş yeparxiya, uşaqlara qarşı cinsi zorakılığa görə 880 milyon dollar təzminat ödəyəcək
Los-Anceles Roma Katolik Baş Yeparxiyası uşaqlıqda katolik keşişləri tərəfindən cinsi istismara məruz qaldıqlarını iddia edən 1353 nəfərə 880 milyon dollar ödəməyə razılaşıb. Bu, ABŞ-da ən böyük kompensasiya hesablaşmalarından biri kimi tarixə düşüb.
Çərşənbə günü verdiyi açıqlamada baş yepiskop Xose H. Qomez baş verən sui-istifadələrə görə dərin təəssüf hissi keçirdiyini bildirib və bu hadisələrin hər birinə görə üzr istəyib.
Baş yeparxiya Kaliforniyada keçmiş uşaq cinsi istismarı hadisələri əsasında yeni iddiaların açılmasına icazə verən qanuna əsasən, sui-istifadə iddialarını vasitəçilik yolu ilə həll etməyə çalışıb.
Baş yeparxiyanın vəkilləri və iddiaçıları təmsil edən vəkillər çərşənbə günü birgə bəyanatda zərərçəkənlərə təşəkkür edərək, zorakılığa məruz qalanların öz hekayələrini paylaşaraq oxşar hadisələrin təkrarlanmamasında mühüm rol oynadıqlarını söyləyiblər.
İddiaçılar adından verilən açıqlamada "Heç bir məbləğ bu cəsur şəxslərdən alınanları geri qaytarmaq üçün kifayət edə bilməz, lakin məsuliyyət ədalətin tələbidir" deyib.
Mənbə: The Guardian
