ÜST: 2023-cü ildə səhiyyəyə xidmətlərinə qarşı 1520 hücum qeydə almışıq
Ümumdünya Səhiyyə Təşkilatının (ÜST) baş direktoru Tedros Adhanom Qebreyesus təkcə 2023-cü ildə səhiyyə xidmətlərinə 1520 hücumun qeydə alındığını açıqlayıb.
Qebreyesus X sosial media platformasında 19 Avqust Ümumdünya Humanitar Yardım Günü münasibətilə paylaşım edib.
Səhiyyə xidmətlərinə edilən hücumların qarşıdurmalarda yeni bir reallıq olduğunu ifadə edən Qebreyesus, "ÜST təkcə 2023-cü ildə səhiyyə xidmətlərinə 1520 hücum qeydə alıb. Bu hücumlar ən az 750 xəstə və tibb işçisinin ölümünə, 1250 nəfərin yaralanmasına səbəb olub" deyib.
Qebreyesus bunun standart halına gəlməsini dayandırmağa çağırıb.
Qeyd edək ki, Birləşmiş Millətlər Təşkilatı (BMT) ötən il dünyada 280 yardım işçisinin öldürüldüyünü və 2023-cü ilin qlobal humanitar birlik üçün ən ölümcül il olduğunu açıqlayıb.
