Hindistan Maldiv adalarından əsgərlərini geri çəkməyə razılaşıb
Hindistan hökuməti əsgərlərini Maldiv adalarından çıxarmağa razılıq verib.
Bu barədə Maldiv adaları prezidenti Mohamed Muizzu bildirib.
Muizzu sentyabr ayında keçirilən prezident seçkilərində Hindistanın təxminən 75 əsgərdən ibarət kiçik hərbi mövcudluğunu aradan qaldırmaq vədi ilə qalib gəlib.
"Müzakirələr zamanı Hindistan hökuməti hind əsgərlərini geri çəkməyə razılıq verdi. Biz həmçinin inkişaf layihələri ilə bağlı məsələlərlə məşğul olmaq üçün yüksək səviyyəli komitə yaratmağa razılaşdıq." deyə Muizzu jurnalistlərə bildirib.
Hindistanın Yeni Dehlidəki yüksək rütbəli hökumət rəsmisi Reuters agentliyinə bildirib ki, Hindistan və Maldiv adaları bu məsələ ilə bağlı müzakirələr aparıblar və hər iki tərəf Hindistanın yardımının vacibliyini etiraf edib.
Qeyd edək ki, Hindistan Maldiv adalarını bəzi hərbi texnika ilə təmin edir, fəlakətlə mübarizəyə kömək edir və orada dəniz gəmiqayırma zavodunun tikintisinə kömək edir.
