Avropa birjalarında dəyişkən meyil müşahid olunur
Avropa birjaları geosiyasi gərginliklər və qlobal miqyasda texnologiya səhmlərində yaşanan kəskin dalğalanmaların təsiri altında dəyişkən dinamika nümayiş etdirir.
AFN.az xəbər verir ki, ABŞ-nin İrana zərbələrini intensivləşdirməsi səbəbindən Yaxın Şərqdə gərginliyin artması bazarlarda risk qavrayışının yüksəlməsinə səbəb olub.
Artan gərginlik fonunda inflyasiyadakı azalmanın müvəqqəti xarakter daşıya biləcəyi ehtimal edilir.
ABŞ Mərkəzi Komandanlığı (CENTCOM) İrana qarşı ikinci zərbə dalğasının başladıldığını açıqlayıb, İran İslam İnqilabı Keşikçiləri Korpusunun sözçüsü general-mayor Hüseyn Muhibbi isə ölkəsinin cavab əməliyyatlarının ABŞ-nin bölgədəki hücum infrastrukturunu məhv etməyə yönəldiyini bildirib.
Bu hadisələrlə Avropa bazarlarında "Stoxx Europe 600" göstərici indeksi 642,7 bənddə qərarlaşıb, Böyük Britaniyanın "FTSE 100" indeksi 0,4 faiz itki ilə 10 476 bəndə düşüb.
Almaniyanın "DAX 40" indeksi 0,1 faiz azalaraq 24 992 bənd, İtaliyanın "FTSE MIB 30" indeksi 0,1 faiz artımla 52 418 bənd, Fransanın "CAC 40" indeksi 0,1 faiz geriləmə ilə 8 373 bənd və İspaniyanın "IBEX 35" indeksi 0,2 faiz yüksəlişlə 19 315 bənd təşkil edir.
Martda 0,3 faiz böyüyən, apreldə isə 0,1 faiz kiçilən Böyük Britaniya iqtisadiyyatı may ayında 0,1 faiz artım göstərib, bu artımda xidmət sektorunun 0,3 faizlik böyüməsi həlledici rol oynasa da, emal və tikinti sektorları müvafiq olaraq 0,5 faiz və 0,8 faiz kiçilib.
Mart-may dövrünü əhatə edən üçaylıq müddətdə Britaniya iqtisadiyyatı əvvəlki üç ayla müqayisədə 0,7 faiz böyüyərək ardıcıl 6-cı rüb də artım dinamikasını qoruyub.
Digər tərəfdən, Almaniya hökuməti 2026-cı ilin ilk yarısında təxminən 13,9 milyard avro dəyərində silah və hərbi texnika ixracına icazə verib.
İqtisadiyyat Nazirliyinin açıqladığı hesabatına əsasən, bu icazələrin 9,6 milyard avroluq hissəsini döyüş silahları, 4,3 milyard avroluq hissəsini isə digər müdafiə avadanlıqları təşkil edib. Ən böyük alıcı 2,5 milyard avroluq payla Ukrayna olub.
Bu arada Ukrayna Prezidenti Volodimir Zelenski hökumətdəki kadr dəyişiklikləri çərçivəsində istefa verən Baş nazir Yuliya Sviridenkonun yerinə yeni hökumət başçısı namizədi kimi "Naftoqaz"ın rəhbəri Serqey Koretskini təqdim etdiyini elan edib və onun parlamentdə məsləhətləşmələr apardığını qeyd edib.
