"Sony"dən gözlənilməz pulsuz "PS Plus" addımı
Fiziki oyun dövrünü bağlamaq qərarı ilə böyük narazılığa səbəb olan "Sony", artan "PlayStation Plus" ləğvlərinin qarşısını almaq üçün büdcənin ağzını açıb.
AFN.az xəbər verir ki, şirkət seçilmiş bəzi istifadəçilərə sürpriz şəkildə birillik pulsuz "Premium" abunəliyi hədiyyə etməyə başlayıb.
"Sony" sürətlə artan abunəlik ləğvlərinin qarşısını almaq üçün indi də bəzi "PlayStation Plus" üzvlərinə birillik pulsuz "Premium" paketi təqdim edir.
Əslində bu addımın arxasında böyük bir etiraz dalğası dayanır, çünki "Sony" 2028-ci ilin yanvar ayından etibarən artıq qutulu (fiziki) oyunlar buraxmayacağını açıqladıqdan bəri oyunçuların kəskin tənqid hədəfinə çevrilib.
Gələn tənqidlər fonunda bir çox insan abunəliyini ləğv etməyə başladıqda şirkət vəziyyəti düzəltmək üçün əvvəlcə ləğvetmə ekranında xüsusi güzəştlər təklif etmişdi.
Hadisə ilk olaraq "Reddit" platformasındakı "r/PlayStationPlus" qrupunda bir istifadəçinin paylaşımı ilə bəlli olub.
Paylaşılan ekran görüntüsündə istifadəçinin hesabına birillik "Premium" paketinə keçid üçün 100 faizlik güzəşt təyin edildiyi görünür.
İstifadəçinin bildirdiyinə görə, bu təklifi qəbul etdikdə mövcud ödəniş dövrünüzün qalan hissəsi üçün birdəfəlik ödəniş (bu istifadəçinin halında vergi daxil olmamaqla 26,23 dollar) etməyiniz tələb olunur.
"Sony"nin pulsuz "PlayStation Plus" təklifi bütün istifadəçilərə şamil edilməyib.
Şirkətin hansı meyarlara əsasən seçim etdiyi və ya kampaniyanın neçə nəfərə çatdığı hələlik məlum deyil və "PlayStation" rəsmiləri tərəfindən də mövzu ilə bağlı rəsmi açıqlama verilməyib.
