ÜST: Ən böyük humanitar böhran Sudanda yaşanır
Ümumdünya Səhiyyə Təşkilatının (ÜST) Sudan üzrə nümayəndəsi Şibli Sahbani Sudanda 33 milyondan çox insanın yardıma ehtiyacı olduğunu və ölkənin dünyanın ən böyük humanitar böhran bölgəsi olaraq qaldığını bildirib.
AFN.az xəbər verir ki, onun sözlərinə görə, həmin insanların 21 milyonu birbaşa tibbi xidmətə ehtiyac duyur.
Sahbani Birləşmiş Millətlər Təşkilatının (BMT) Cenevrə ofisinin həftəlik mətbuat konfransına onlayn formatda qatılaraq vəziyyəti qiymətləndirib.
Sudandakı proseslərlə bağlı məlumat vermək üçün iki ildən artıqdır BMT-nin mətbuat konfranslarında iştirak etdiyini xatırladan Sahbani fasiləsiz humanitar yardım səylərinə, Sudan rəsmilərinin və tibb işçilərinin fədakarlığına baxmayaraq, vəziyyətin pisləşməkdə davam etdiyini qeyd edib.
O, son dövrlərdə geri qayıdanların olmasına rəğmən, didərgin düşmə nisbətinin yüksək qaldığını, ölkədə 13,4 milyon insanın ev-eşiyindən uzaq düşdüyünü, onlardan təxminən 9 milyonunun ölkə daxilində, 4,6 milyonunun isə sərhəddən kənarda sığındığını vurğulayıb.
Ölkənin bir çox əyalətində denq qızdırması, malariya, qızılca, meningit, hepatit E və indi də vəba epidemiyasının tüğyan etdiyini bildirən Sahbani, əvvəlki epidemiyanın bitməsindən cəmi iki ay sonra Qərbi Kordofanda xəstəliyin yenidən baş qaldırması ilə iyunun 27-də rəsmən vəba epidemiyası elan edildiyini deyib.
Sahbani qeyd edib ki, vəba o vaxtdan bəri Şimali Kordofan, Mərkəzi Darfur və Cənubi Darfura yayılaraq 1330-dan çox yoluxma halına və 114 ölümə səbəb olub, bu isə 13,7 faizlik ölüm göstəricisi deməkdir və ÜST-nin 1 faizdən az olan kritik həddini xeyli üstələyir.
Yağış mövsümünün vəziyyəti daha da ağırlaşdıracağını gözlədiklərini bildirən rəsmi, daşqınların və çirklənmiş su mənbələrinin vəba kimi su vasitəsilə yayılan xəstəliklər üçün əlverişli şərait yaratdığını vurğulayıb.
Vəba epidemiyasının digər əyalətlərə də yayılmasından narahat olduqlarını ifadə edən Sahbani, ÜST-nin nəzarəti, yoluxma hallarının idarə olunmasını, infeksiyanın qarşısının alınmasını, cəmiyyətin maarifləndirilməsini və ləvazimatların paylanmasını gücləndirərək vəba ilə mübarizəni koordinasiya etdiyini, həmçinin prosesi dəstəkləmək üçün Sudan daxilində 64 metrik tonluq vəba əleyhinə tibbi dəstləri əvvəlcədən yerləşdirdiklərini bəyan edib.
Xatırladaq ki, Sudanda 2023-cü ilin aprelindən bəri ordu ilə Çevik Dəstək Qüvvələri arasında davam edən qarşıdurmalar səbəbindən on minlərlə insan həyatını itirib, milyonlarla insan didərgin düşüb.
BMT-nin məlumatlarına görə, ölkədə milyonlarla insan həm də aclıq təhlükəsi ilə üz-üzədir.
