Anomal isti hava Fransada atom elektrik stansiyalarına zərbə vurdu
Fransada atom elektrik stansiyalarında elektrik enerjisi istehsalı ekstremal isti hava şəraiti səbəbindən son təxminən doqquz ayın ən aşağı səviyyəsinə düşüb.
AFN.az xəbər verir ki, bu barədə "Bloomberg" agentliyi məlumat yayıb.
Bu vəziyyət çay sularının reaktorları soyutmaq üçün həddindən artıq isinməsi səbəbindən baş verib və "Electricite de France" şirkətini generasiyanı azaltmağa məcbur edib.
Hadisənin fəsadları artıq enerji bazarlarına da təsir göstərib.
Bazar ertəsi, iyunun 29-da Fransada iyul ayı üçün elektrik enerjisi fyuçersləri 27 faiz sıçrayaraq bir meqavat-saat üçün 81,01 avroya yüksəlib.
Atom elektrik stansiyalarında orta elektrik enerjisi istehsalı iyunun 28-də 33 giqavatdan aşağı düşüb.
Mövcud vəziyyət ölkənin elektrik enerjisinin təxminən üçdə ikisini təmin edən və Avropa enerji sistemində mərkəzi rol oynayan Fransa atom energetikası üçün tez-tez təkrarlanan isti hava dalğalarının getdikcə daha böyük problemə çevrildiyinin növbəti sübutu olub.
Qeyd olunur ki, isti dövrlərdə Fransanın qaz elektrik stansiyalarında gündəlik elektrik enerjisi istehsalı kəskin şəkildə artıb.
Fransanın kənd təsərrüfatı naziri Anni Jenevarın sözlərinə görə, bu Avropa ölkəsini bürüyən anomal isti hava ilin sonunda məhsuldarlığın qaçılmaz olaraq azalmasına gətirib çıxaracaq.
Ən böyük itkilər buğda və qarğıdalı kimi dənli bitkilər seqmentində qeydə alınacaq, eyni zamanda heyvandarlıq sektoru da bu vəziyyətdən zərər çəkir.
