Kanadada bir nəfərin hantavirus testi pozitiv çıxdı
Üç nəfərin ölümünə yol açan hantavirus epidemiyasının mərkəzindəki "MV Hondius" adlı sərnişin gəmisindən Kanadaya qayıdan və karantində saxlanılan dörd nəfərdən birinin test nəticəsi pozitiv çıxıb.
AFN.az xəbər verir ki, Kanada Səhiyyə Nazirliyinin rəsmiləri hantavirus epidemiyasının yaşandığı Niderland bayrağı altında üzən sərnişin gəmisində olan və ölkələrinə döndükdən sonra Britaniya Kolumbiyası bölgəsində karantinə alınan dörd Kanada vətəndaşından birində virus aşkarlandığını bəyan ediblər.
Nazirliyin rəsmisi doktor Bonni Henri keçirdiyi mətbuat konfransında yüngül qızdırma və baş ağrısı şikayətləri başlayan xəstənin Viktoriyadakı xəstəxanalardan birinə yerləşdirilərək izolyasiya edildiyini və ilkin testlərin pozitiv nəticə verdiyini bəyan edib.
Rəsmi şəxs xəstənin vəziyyətinin hazırda stabil olduğunu və prosesin ən başından bəri planlaşdırıldığı kimi ciddi nəzarət altında irəlilədiyini bildirib.
Xəstəliyə yoluxan şəxslə eyni gəmidə səyahət edən həyat yoldaşının test nəticələri neqativ çıxsa da, təhlükəsizlik məqsədilə xəstəxanada nəzarət altında saxlanılmasına qərar verilib.
Eyni karantin mərkəzində qalan üçüncü bir şəxs də ehtiyat tədbiri olaraq xəstəxanaya köçürüldüyü halda, dördüncü nəfərin evindəki gündəlik təqib və izolyasiya prosesi davam edir.
Mayın 10-da Kanadaya çatdıqda heç bir simptom göstərməyən bu şəxslərin virusun inkubasiya dövrü səbəbindən ən azı 21 gün boyunca müşahidə altında saxlanılacağı bildirilib.
Digər tərəfdən, epidemiyanın mənbəyinə dair araşdırmalarını davam etdirən Fransadakı Paster İnstitutu gəmidəki fransız sərnişindən götürülən virusun genetik xəritəsini hazırlayıb.
Aparılan analizlərdə gəmidə yayılan virusun Cənubi Amerikadakı gəmiricilərdə görünən "Andes virusu" ilə 97 faiz nisbətində uyğunluq təşkil etdiyi müəyyən olunub.
Ekspertlər virusun strukturunda onu daha yoluxucu və ya daha təhlükəli edəcək yeni bir mutasiyaya rast gəlinmədiyini, mövcud fərqliliyin tamamilə təbii variasiyalardan qaynaqlandığını açıqlayıblar.
Qeyd edək ki, "MV Hondius" gəmisində 11 apreldən bu yana hantavirus şübhəsi ilə almaniyalı bir qadın və niderlandlı bir cütlük həyatını itirib.
