ABŞ Yaxın Şərqə minlərlə əlavə hərbçi göndərir
ABŞ rəsmiləri bu gün verdikləri açıqlamada ABŞ və İsrailin İrana qarşı başlatdığı müharibənin üçüncü həftəsinə qədəm qoyması ilə bölgəyə minlərlə əlavə dəniz piyadası və dənizçinin göndəriləcəyini bildiriblər.
AFN.az xəbər verir ki, adının açıqlanmasını istəməyən rəsmilər hələlik İran ərazisinə qoşun yeridilməsi barədə qəti qərar qəbul edilmədiyini, lakin bu addımın əməliyyat potensialını artıracağını qeyd ediblər.
"USS Boxer" amfibiya hücum gəmisi, dəniz piyadalarının ekspedisiya bölməsi (MEU) və onu müşayiət edən döyüş gəmiləri ilə birlikdə bölgəyə doğru hərəkət edəcək. Rəsmilərdən biri bölmələrin ABŞ-ın Qərb sahilindən planlaşdırılandan təxminən üç həftə tez ayrıldığını vurğulayıb. Bu yeni təyinatla bölgədəki mövcud 50 min ABŞ hərbçisinə əlavə qüvvələr qoşulmuş olacaq.
Məlumata görə, ABŞ ordusu 28 fevralda başlayan İran əməliyyatının növbəti mərhələlərinə hazırlaşır. Ehtimal olunan fəaliyyət planları arasında ABŞ qüvvələrinin İran sahil xəttində yerləşdirilərək Hörmüz boğazının nəzarətə götürülməsi və strateji Xark adasına quru qoşunlarının göndərilməsi variantları yer alır.
ABŞ Prezidenti Donald Tramp cümə axşamı verdiyi açıqlamada hər hansı bir yerə hərbçi göndərmədiyini söyləsə də, "əgər göndərməli olsaydım, bunu jurnalistlərə deməzdim" ifadəsini işlədib. Quru qoşunlarının istifadə edilməsi, ictimai dəstəyin aşağı olması və seçki öncəsi vədlər səbəbindən ciddi siyasi risklər daşıyır.
