ABŞ-ın Aralıq dənizi - Oman xəttindəki hərbi gəmilərinin sayı 23-ə çatdı
ABŞ İranla yaşanan gərginlikdən sonra Aralıq dənizindən Oman dənizinə qədər uzanan xətt üzrə hərbi varlığını gücləndirərək döyüş gəmilərinin sayını 23-ə çıxarıb. Açıq mənbəli kəşfiyyat məlumatlarını izləyən və təhlil edən mənbələrdən əldə edilən xülasəyə görə, ABŞ-ın Aralıq dənizində 10, Ədən körfəzində 1, Oman dənizində 10, Bəsrə körfəzində isə 2 döyüş gəmisi var.
ABŞ-ın hazırda Aralıq dənizində yerləşən 1 aviadaşıyıcı, 8 esmines və 1 yanacaqdoldurma gəmisi olmaqla, ümumilikdə 10 döyüş gəmisi xidmət aparır. ABŞ donanmasının ən yeni nəsil aviadaşıyıcısı olan "USS Gerald R. Ford" nüvə mühərrik sistemi sayəsində uzun müddət yanacaq doldurmadan tapşırıq icra edə bilir. Tam yüklü çəkisi təxminən 100 min tona çatan gəmi 75-ə qədər döyüş təyyarəsi daşıma imkanı ilə açıq dənizlərdə hava əməliyyatlarının keçirilməsini təmin edir.
Gəmi inkişaf etmiş radar sistemləri, elektron müharibə imkanları və yaxın hava hücumundan müdafiə sistemləri ilə təchiz olunub və nüvə reaktoru ilə çalışır. Təxminən 4 min 550 personalın xidmət etdiyi gəmi ABŞ-ın qlobal hərbi çəkindirmə gücünün əsas ünsürlərindən biri kimi önə çıxır. "Arleigh Burke" sinfinə məxsus idarəolunan raket buraxan esmineslər isə hava hücumundan müdafiə, sualtı qayıqlara qarşı müdafiə və ballistik raketlərdən müdafiə kimi əməliyyat imkanları ilə çoxfunksiyalı tapşırıqlar yerinə yetirə bilir.
Bundan əlavə, torpeda sistemləri, yaxın hava müdafiə silahları və təkmil radar sensorları ilə təchiz edilmiş esmineslər aviadaşıyıcı qruplarının qorunmasında kritik rol oynayır. Təxminən 300 nəfərlik heyətlə fəaliyyət göstərən bu esmineslər həm hava təhdidlərinə qarşı qalxan yaradır, həm də zərurət yarandıqda quru hədəflərinə qarşı uzaq mənzilli dəqiq vuruş gücü təmin edir. "Henry J. Kaiser" sinfinə məxsus təchizat gəmisi "USS Kanawha" isə dənizdə yanacaq və loqistik dəstək təmin edərək əməliyyatların davamlılığında mühüm yer tutur.
Ədən və Bəsrə körfəzlərindəki hərbi mövcudluq
ABŞ donanmasında cəmi 45 ədəd olan "Arleigh Burke" sinfi esmineslərdən biri — "USS Delbert D. Black" Ədən körfəzində yerləşir. Təxminən 280 nəfərlik heyətlə xidmət edən bu gəmi aviadaşıyıcı qruplarını müşayiət etmək və lazım gəldikdə müstəqil tapşırıq icra etmək imkanı ilə tanınır.
ABŞ-ın Bəsrə körfəzində isə 1 esmines və 1 sahil döyüş gəmisi olmaqla cəmi 2 döyüş gəmisi var. "Independence" sinfinə məxsus sahil döyüş gəmisi "USS Tulsa" xüsusilə dar və sıx sularda sürətli reaksiya imkanı təqdim edir. Sahil sularında minaların təmizlənməsi, sualtı qayıqlara qarşı müdafiə və düşmən sahil zonasına təzyiq göstərmək üçün nəzərdə tutulan bu gəmidə təxminən 40 hərbi personal xidmət edir.
Oman dənizindəki qüvvələr
ABŞ-ın Oman dənizində 10 hərbi vahidi yerləşir: 1 aviadaşıyıcı, 5 esmines, 2 yanacaqdoldurma gəmisi və 2 sahil döyüş gəmisi. ABŞ donanmasındakı 10 "Nimitz" sinfi aviadaşıyıcıdan biri olan "USS Abraham Lincoln" gəmisində 5 min 750 hərbi personal xidmət aparır. Oman dənizindəki esmineslərdə isə təxminən 1380 nəfər vəzifədədir.
"Lewis and Clark" sinfinə məxsus təchizat gəmisi "USS Carl M. Brashear" sursat, ehtiyat hissə, ərzaq və digər loqistik ləvazimatları dənizdə döyüş gəmilərinə ötürə bilir. Digər yanacaq gəmisi "Henry J. Kaiser" isə hərəkətdə olan gəmilərə yanacaq transferi edərək donanmanın əməliyyat radiusunu əhəmiyyətli dərəcədə artırır. "Independence" sinfi sahil döyüş gəmiləri olan "USS Canberra" və "USS Santa Barbara" isə 40 nəfərlik heyətləri ilə ABŞ-ın sahil bölgələrində çevik reaksiya imkanlarını yüksəldir.
