Peskovdan VotsApp-a Rusiya qanunlarına əməl etmək çağırışı
Kremlin mətbuat katibi Dmitri Peskov Rusiyada bir müddət əvvəl girişi bloklanan VotsApp-ın qanunlara əməl edəcəyi təqdirdə yenidən fəaliyyətə başlaya biləcəyini bəyan edib.
Peskov Rusiyanın TASS xəbər agentliyinə verdiyi açıqlamada 2025-ci ilin noyabr ayından etibarən ölkədə girişi məhdudlaşdırılan VotsApp mesajlaşma tətbiqi haqqında danışıb. VotsApp-ın "Meta" şirkətinə məxsus olduğunu xatırladan Peskov "Bu, qanunlara riayət etmə məsələsidir. Əgər 'Meta' qanunlara əməl edib Rusiya rəsmi qurumları ilə əlaqə saxlayarsa, o zaman razılığa gəlmək mümkün ola bilər" deyib.
Peskov Rusiyanın tələblərinə məhəl qoyulmayacağı təqdirdə VotsApp-a qoyulan qadağanın ləğv edilməyəcəyini vurğulayıb.
Rusiyanın İnformasiya Texnologiyaları və Kütləvi Kommunikasiyalara Nəzarət Federal Xidmətindən (Roskomnadzor) 2025-ci ilin noyabrında verilən açıqlamada qanunvericiliyi pozduğu əsası ilə VotsApp-ın mərhələli şəkildə bloklanmağa başlandığı bildirilmişdi. Ölkədə VotsApp-a giriş həmin tarixdən etibarən dayandırılsa da, istifadəçilər tətbiqə daxil olmaq üçün VPN xidmətlərindən istifadə etməyə başlamışdılar.
Rusiyada Telegram-a qarşı da müəyyən məhdudiyyətlər tətbiq olunur. Eyni zamanda bir müddət əvvəl istifadəyə verilən yerli tətbiq — MAX başda dövlət müəssisələri olmaqla ölkədə sürətlə yayılmağa başlayıb.
