ABŞ-da inşaatçı paltarında 3,2 milyon dollarlıq soyğunçuluq
ABŞ-ın New York şəhərində üç nəfərdən ibarət oğru dəstəsinin iki üzvü inşaat işçisi paltarı geyinərək, daxil olduqları evdən içərisində zərgərlik və nağd pul olan seyfi oğurlayıb. Oğurlanan əşyaların ümumi dəyərinin 3,2 milyon dollar olduğu açıqlanıb.
Hadisə 16 oktyabr saat 14:20 radələrində Quins bölgəsi, Yamayka Hills məhəlləsində baş verib. New York Polis Departamenti (NYPD) bildirib ki, şübhəlilər evin arxa qapısını qıraraq daxil olub, daha sonra seyf və yüksək dəyərli zərgərlik əşyalarını götürərək qaçıblar.
Polis açıqlayıb ki, təhlükəsizlik kameraları şübhəlilərin mavi Hyundai Elantra ilə hadisə yerindən şərqə doğru qaçdığını göstərib.
Şübhəlilərdən biri qara idman şalvarı, neon rəngli tikinti jileti, ağ papaq, eynək və qara bel çantası, digəri isə qara idman köynəyi, neon narıncı gödəkçə, ağ papaq, üz maskası və qara bel çantası geyinib.
Üçüncü şübhəli isə avtomobili idarə edib. O, təhlükəsizlik kameralarında ağ kapüşonlu sviter, qara şalvar və boz idman ayaqqabısı ilə müşahidə olunub.
Polis bildirib ki, hadisədə heç kəs xəsarət almayıb və araşdırma davam edir. Şübhəlilər hələ də tutulmayıb.
Rəsmi şəxslər qeyd ediblər ki, oğrular peşəkar planla hərəkət ediblər. Gündüz vaxtı və sıx məhəllədə baş verən bu soyğun son illərin ən diqqətçəkən zərgərlik oğurluqlarından biri hesab olunur.
