48 yaşlı vəzifəli şəxs iş yerində ürək tutmasından vəfat etdi
Azərbaycanda 48 yaşlı vəzifəli şəxs iş yerində ürək tutmasından vəfat edib.
Teleqraf-ın əldə etdiyi xəbərə görə, hadisə iyunun 24-də günorta saatlarında Bakının Nərimanov rayonu ərazisində, keçmiş məcburi köçkün rayonlarının icra hakimiyyətlərinin yerləşdiyi inzibati binada baş verib.
Cəbrayıl Rayon İcra Hakimiyyəti başçısının Cəbrayıl şəhər inzibati ərazi dairəsi üzrə nümayəndəsinin müavini, İcra Hakimiyyətinin Bakı şəhərindəki səlahiyyətli nümayəndəsi Ruhid Mehdiyevin iş yerində halı pisləşib. Hadisə yerinə təcili tibbi yardım çağırılıb. Lakin həkimlər gələnə qədər o, vəfat edib.
Məlumata görə, R.Mehdiyev əvvəllər iki dəfə ürək əməliyyatı keçiribmiş.
Qeyd edək ki, Mehdiyev Ruhid Qaçay oğlu 1977-ci ildə anadan olub. Əvvəllər Cəbrayıl Rayon Məhkəməsində çalışıb. Ailəli idi, iki övladı qalıb. Övladlarından biri 3-cü, digəri isə 9-cu sinifdə oxuyur. Mərhumun sabah dəfn olunacağı bildirilir.
