Çernobılın əkin sahələri illər sonra kənd təsərrüfatı üçün yararlı hesab edildi
Ukraynada 1986-cı ildə Çernobıl AES-də baş vermiş faciədən sonra tərk edilmiş kənd təsərrüfatı torpaqlarının yenidən kənd təsərrüfatına yararlı hala gəldiyi müəyyən edilib.
Nüvə qəzasından sonra Ukraynanın şimalında geniş ərazilər kənd təsərrüfatı üçün yararsız hesab edilib. Elektrik stansiyasının ətrafındakı 4200 kvadrat kilometrlik Çernobıl İstisna Zonası bu gün də insan həyatı üçün bağlıdır və Avropanın ən böyük təbiəti mühafizə zonalarından biridir.
Bununla belə, heç vaxt tam evakuasiya olunmamış 2000 kvadrat kilometrlik Məcburi Köçürmə Zonasında minlərlə insan yaşamağa davam edir.
Fəlakətdən sonrakı illərdə radioaktiv çürümə və yerüstü torpağın eroziyası nəticəsində ərazidə radiasiya səviyyəsi əhəmiyyətli dərəcədə azalıb. Buna baxmayaraq, 1991-ci ildə meyarlar müəyyən edildikdən sonra tərk edilmiş torpaqlar üçün yeni təsnifat aparılmamışdır.
Son illər rayonda bəzi fermerlər məhdud da olsa öz təşəbbüsləri ilə kənd təsərrüfatı məhsulları istehsalına başlayıblar.
İndi isə "Journal of Environmental Radioactivity" elmi jurnalında dərc olunan yeni bir araşdırma, bitkilərin əksər ərazilərdə təhlükəsiz şəkildə yetişdirilə biləcəyini təsdiqləyir.
Tədqiqatçılar Jitomir vilayətində təxminən 100 hektar sahədə çirklənmə səviyyəsini araşdırıb və kartof, taxıl, qarğıdalı, günəbaxan kimi adi bitkilərdə radioaktiv maddələrin yığılmasını təxmin ediblər.
Torpaq nümunələri götürərək və xarici qamma radiasiya səviyyələrini ölçməklə, kənd təsərrüfatı işçilərinin məruz qalacağı radiasiya dozasının Ukraynanın milli təhlükəsizlik həddindən xeyli aşağı olduğunu təsdiq ediblər.
Bu tapıntılar o deməkdir ki, lazımi nəzarət və Ukraynanın qida təhlükəsizliyi qaydalarına riayət etməklə, əvvəllər məhdudlaşdırılmış bu ərazilərdə bir çox məhsul təhlükəsiz şəkildə yetişdirilə bilər.
