Brent neftinin bir bareli 98,47 dollardan satılır
Brent neftinin bir bareli beynəlxalq fyuçers bazarlarında 98,47 dollardan satılır.
AFN.az xəbər verir ki, dünən 98,06 dollara qədər yüksələn Brent neftinin fyuçers üzrə barel qiyməti günü 97 dollardan başa vurub.
Brent neftinin noyabr fyuçers kontraktının bir barel qiyməti bu gün saat 10:40-a olan məlumata görə, əvvəlki bağlanışla müqayisədə 1,5 faiz artaraq 98,47 dollar olub. Eyni dəqiqələrdə Qərbi Texas tipli (WTI) xam neftin oktyabr fyuçers kontraktının bir barel qiyməti isə 93,87 dollar təşkil edib.
Neft qiymətlərinin artmasında ABŞ-İran gərginliyinin Yaxın Şərqdə təchizat təhlükəsizliyi ilə bağlı narahatlıqları artırması və Hörmüz boğazında neft daşımalarının yavaşlaması təsirli olub.
Bazarlarda qarşıdurmaların uzanması və enerji infrastrukturunun, eləcə də bölgədə dəniz daşımalarının hədəfə alınması ehtimalı neft tədarükündə daha böyük fasilələrin yaşana biləcəyi ilə bağlı narahatlığı gücləndirərək qiymətləri dəstəkləyir.
Digər tərəfdən, Səudiyyə Ərəbistanının Energetika Nazirliyi də ölkənin cənubundakı bəzi enerji obyektlərinin hədəfə alındığını və bəzi ərazilərdə yanğınların baş verdiyini açıqlayıb.
Beynəlxalq mətbuatda yer alan xəbərlərə görə, Saudi Aramco-nun Cizandakı obyektlərinin yenidən hədəfə alınması da neft tədarükü ilə bağlı narahatlıqları artırır. Qırmızı dəniz sahilində, Yəmən sərhədinə yaxın yerləşən və gündəlik təxminən 400 min barel neft emal etmək gücünə malik Cizan Neft Emalı Zavoduna iyul ayında həyata keçirilən hücumdan sonra neft daşımaları nəzərəçarpacaq dərəcədə azalarkən, avqust ayında zavoddan ixrac həyata keçirilmədiyi bildirilir.
Analitiklər Yaxın Şərqdəki böhranın 2027-ci ilə qədər uzana biləcəyi proqnozu fonunda neft qiymətləri ilə bağlı gözləntilərini də yuxarı istiqamətdə yeniləməyə başlayıblar. Bazarlarda müharibədən əvvəlki neft daşınması səviyyələrinə tam qayıdışın 2027-ci ilin birinci rübünün sonu və ya ikinci rübünün əvvəlindən əvvəl baş verməsi gözlənilmir.
Brent neftində texniki baxımdan 98,55 dollar müqavimət, 97,28 dollar isə dəstək səviyyəsi kimi izlənilə bilər.
