El Nino gələn ilin sonunadək 50 milyon insanı kəskin aclıq təhlükəsi ilə üz-üzə qoya bilər
Sürətlə güclənən El Nino iqlim hadisəsinin gələn ilin sonunadək təxminən 50 milyon insanı kəskin aclıqla qarşı-qarşıya qoya biləcəyi açıqlanıb.
AFN.az xəbər verir ki, açıqlamada bu vəziyyətin Afrikanın bəzi bölgələrində illərdir davam edən quraqlıq və Yaxın Şərqdəki münaqişələrin ərzaq qiymətlərinə göstərdiyi təzyiq səbəbindən artıq ağır ərzaq çatışmazlığı yaşayan yüz milyonlarla insanın vəziyyətini daha da ağırlaşdıracağı bildirilib.
BMT-nin Dünya Ərzaq Proqramı çərşənbə günü yaydığı xəbərdarlıqda qeyd edib ki, El Ninonun bəzi proqnozlardan daha zəif keçəcəyi halda belə, bir çox ölkə ciddi ərzaq böhranı ilə üzləşəcək.
Məlumata görə, bu hadisə hazırda 45 ölkədə kəskin ərzaq çatışmazlığı yaşayan 225 milyon nəfərə əlavə olaraq 20 faizdən çox insanın risk qrupuna daxil olmasına səbəb ola bilər.
Təhlilə əsasən, Mərkəzi və Cənubi Amerika, Karib hövzəsi və Cənubi Afrika El Ninonun təsirlərindən ən çox zərər görəcək bölgələr olacaq. Cənubi və Cənub-Şərqi Asiyada isə yağıntının normadan az olacağı, bunun kənd təsərrüfatı və fermerlər üçün ciddi problemlər yaradacağı bildirilir.
Mütəxəssislərin fikrincə, Sakit okeanda bir neçə ildən bir formalaşaraq dünya üzrə yağıntı rejimini dəyişdirən El Nino hadisəsi son 70 ilin ən güclü səviyyəsinə çata bilər.
Qeyd olunur ki, bu hadisənin təsir gücü və şiddəti iqlim böhranının yaratdığı dəyişikliklərdən ciddi şəkildə təsirlənir.
Ekspertlər bildirirlər ki, güclü El Nino qlobal istiləşmə ilə birlikdə bu ili və ya daha yüksək ehtimalla 2027-ci ili Yer kürəsində indiyədək qeydə alınmış ən isti il edə bilər.
Dünya Ərzaq Proqramı tərəfindən hazırlanan hesabat qlobal aclığın El Nino fonunda mümkün təsirlərini əhatəli şəkildə qiymətləndirən ilk araşdırma hesab olunur. Qurum ən azı 80 milyon ABŞ dolları həcmində vəsait hesabına erkən xəbərdarlıq sistemləri və qabaqlayıcı humanitar tədbirlər həyata keçirməklə ekstremal hava şəraitinin təsirlərini azaltmağı hədəfləyir.
Bildirilib ki, Cənubi Afrikada əsas əkin mövsümü bu ilin oktyabrından 2027-ci ilin mart ayına qədər davam edəcək. Lakin ən ağır nəticələrin məhsul yığımından sonrakı aclıq dövründə hiss olunacağı gözlənilir.
Qurum rəsmilərinin sözlərinə görə, ərzaq təhlükəsizliyi baxımından ən ciddi problemlər 2027–2028-ci illərin aclıq mövsümündə məhz Cənubi Afrikada yaşana bilər.
Ekspertlər hesab edirlər ki, fermerlər ötən ilin uğurlu məhsulu sayəsində müəyyən qədər qoruna bilərlər. Bununla yanaşı, Yaxın Şərqdə davam edən münaqişələrin ərzaq qiymətlərinə artım istiqamətində təzyiq göstərdiyi vurğulanır.
Xatırladılıb ki, 2015–2016-cı illərdə baş vermiş El Nino hadisəsi zamanı təxminən 60-100 milyon nəfər kəskin ərzaq çatışmazlığından əziyyət çəkmişdi. Mütəxəssislər ümid edirlər ki, builki hava hadisəsi daha güclü olsa belə, qabaqlayıcı tədbirlər sayəsində onun mənfi təsirləri əvvəlki dövrlə müqayisədə daha məhdud olacaq.
Hesabat yalnız Dünya Ərzaq Proqramının fəaliyyət göstərdiyi və ərzaq təhlükəsizliyi məlumatlarının toplandığı 45 ölkəni əhatə edir. Bununla belə, digər ölkələrdə də əlavə təsirlərin müşahidə oluna biləcəyi qeyd edilir. Eyni zamanda, iri ixracatçı dövlətlərin ərzaq ixracına məhdudiyyət qoymasının qarşısının alınmasının vacibliyi vurğulanır.
