Meksikada sosial media fenomeni canlı yayım zamanı güllələnərək öldürülüb
Meksikada məşhur sosial media məzmun istehsalçısı kartel zorakılığının geniş yayıldığı Sinaloa ştatında yerləşən restoranın qarşısında canlı yayım etdiyi zaman silahlı hücum nəticəsində öldürülüb.
AFN.az xəbər verir ki, TikTok platformasında təxminən 600 min izləyicisi olan və komediya videoları ilə tanınan Sezar Qastelum Kuliakan şəhərində yerləşən fast-food restoranının qarşısında iki dostu ilə birlikdə çəkiliş aparırdı.
Bildirilib ki, hər üç şəxs yemək çatdırılması xidməti əməkdaşlarının geyindiyi parlaq narıncı gödəkçələr və bel çantaları daşıyırdı.
İki nəfərin olduğu motosiklet onların yaxınlığında dayanıb. Motosikletin arxasında əyləşən silahlı şəxs tapançanı çıxararaq Sezar Qasteluma yaxın məsafədən atəş açıb.
Sinaloa ştatının təhlükəsizlik rəsmisi Qastelumun ölümünü təsdiqləyərək hadisə ilə bağlı genişmiqyaslı təhlükəsizlik əməliyyatına başlanıldığını açıqlayıb.
Bu qətl Sinaloa kartelinin müxtəlif qruplaşmaları arasında nəzarət uğrunda mübarizənin davam etdiyi Kuliakan şəhərində baş verən növbəti zorakılıq hadisəsi kimi qiymətləndirilir.
Meksikanın Təhlükəsizlik Kabineti X sosial şəbəkəsində yaydığı açıqlamada Qastelumun cinayətkar qrupla əlaqələndirilən bəzi paylaşımlarının araşdırıldığını bildirib. Açıqlamada qeyd olunub ki, hadisənin məsul şəxslərinin müəyyən edilərək saxlanılması üçün müşahidə kameralarının görüntüləri və digər sübutlar təhlil edilir.
Meksika Prezidenti Klaudiya Şeynbaum da hüquq-mühafizə orqanlarının qətli araşdırdığını və hadisəni törədən şəxslərin müəyyənləşdirilməsi istiqamətində iş apardığını bildirib.
Şeynbaum keçirdiyi mətbuat konfransında vurğulayıb ki, cinayətin birbaşa icraçıları ilə yanaşı, sifarişçilər də müəyyən edilərək məsuliyyətə cəlb olunmalı, bu faciəli hadisənin motivləri tam şəkildə üzə çıxarılmalıdır.
Yerli KİV-in məlumatına görə, 2024-cü ilin sentyabrından, Sinaloa kartelinin iki qruplaşması arasında silahlı qarşıdurmalar başlayandan bəri Kuliakan şəhərində azı 12 sosial media məzmun istehsalçısı öldürülüb.
Məlumata əsasən, sosial media fenomenləri Xalisko ştatında da hədəfə çevriliblər. Ötən il 23 yaşlı Valeriya Markes də TikTok-da canlı yayım etdiyi zaman gözəllik salonunda güllələnərək öldürülmüşdü.
Hüquq-mühafizə orqanları həmin cinayətlə əlaqədar Xalisko Yeni Nəsil Karteli ilə əlaqəli cinayət qrupunun rəhbəri Ramon Angel Alvarez Ayalanın saxlanıldığını açıqlamışdı.
Ayala həmçinin Miçoakan ştatının ikinci böyük şəhəri olan Uruapanın meri Karlos Manzonun 2025-ci ilin noyabrında qətlə yetirilməsi barədə göstəriş vermək və sui-qəsdi maliyyələşdirməkdə də ittiham olunur.
